DILI, STLTIMORLESTE.com – Eskola Sekundáriu Nobel da Paz sei halao orientasaun ba estudantes sira, hodi bele fo esplikasaun kona-ba regulamentu eskola nian.
Kestaun nee hatoo husi Diretor Eskola Sekundariu Nobel da Paz, Jeremias P. de Jesus ba jornalista STL, Tersa nee (06/01/2026).
“Agora daudaun matrikula lao hela, iha primeiru etapa nee halao iha loron 15 too fulan Dezembru 2025, faze daruak nian hahu fali iha Segunda horiseik too iha loron 16 fulan ida nee, kona-ba orientasaun ninia nee ami seidauk simu kalendariu husi Edukasaun Munisipiu Dili, maibe orientasaun ba ami nian estudantes sira nee hahu iha loron 10 ba leten nee ami komesa ona, atu nunee ami bele fo esplikasaun ba ita nian estudantes sira kona-ba regulamentu eskola ninia, oinsa mak ita nian estudantes sira bele hatene regulamentu sira nee,” nia esplika.
Jeremias dehan, orientasaun nee sei halao durante loron ida ka rua nunee, maibe regras nee estudantes foun no estudantes neebe muda mai husi eskola seluk nee sira tenke tuir hotu orientasaun.
Nunee mos Diretor Eskola Sekundariu Jeral nu. 4 Setembru Balide, Sergio A.da Cruz hatete, orientasaun nee sei halao iha loron 7 fulan ida nee nian laran, tanba nee estudantes sira sei partisipa iha orientasaun refere.
“Hahu inisiu ano letivu nian dia 12 Janeiru 2026, dia 10 mak foin komesa, tanba nee ita nian estudantes sira sei partisipa iha orientasaun ida nee,” nia informa.
Jornalista: Jacinta Sequeira
