DILI, STLTIMORLESTE.com – Nomeasaun Prezidente Tribunal Rekursu (PTR) sei hamosu preokupasaun balu iha publiku, tanba nee Provedor Direitus Humanus no Justisa (PDHJ) deklara katak, haruka ona parte legal sira atu haree kona-ba lei neebe uza hodi nomeia PTR.
“Hau seidauk bele tama too iha neeba, tanba nee kompetensia orgaun soberanu iha Prezidente Republika iha kompetensia hodi nomeia, kona-ba nomeasaun nee tuir ka la tuir hau komunika ona ami nia parte legal nian atu haree katak, se nomeasaun nee kontrariu ho Konstituisaun prinsipiu Konstituisaun nian, Provedor bele uza kompetensia tuir artigu 150 no artigu 151 atu husu fiskalizasaun abstrata ba Tribunal Rekursu neebe funsiona hanesan Supremu Tribunal Justisa,” dehan Provedor Virgilio da Silva Guterres ba jornalista sira iha Kaikoli, Kuarta (07/05/2025).
Sublina, lei nee PR foin promulga no Publika nomeasaun lao kedan, tanba nee parte legal nian sei haree hela, atu konfirma deit lei foun neebe sai baze ba Prezidente atu noemeia Juiz segunda klase ba pozisaun PTR.
Esplika, se nota mak iha violasaun ruma Provedor sei uza kompetensia tuir artigu 150 no artigu 151 atu husu fiskalizasaun abastrata ba Tribunal Rekursu.
Iha fatin ketak, Akademiku UNTL, Sebastiao dos Santos dehan, lei fo dalan la aseita ho nomeasaun nee, bele liu husi dalan neebe iha.
“Ita iha Tribunal Rekursu, se konsidera buat balu lalos bele halo fiskalizasaun ba iha Tribunal Rekursu hodi deside kona-ba konstituisional ka inkonstituisional,” dehan nia.
Nia hatutan, Tribunal Rekursu hanesan orgaun ida neebe importante atu deside kona-ba fiskalizasaun sira neebe hatama. Tanba nee parte balu sei iha duvidas bele hatama fiskalizasaun hodi Tribunal deside.
(ter)
