DILI, STLTIMORLESTE.com – Relasiona ho Prezidente Republika (PR) fo pose ba Antonio da Conceição “Kalohan” hodi sai Embaixador Timor Leste ba Suisa, Jurista konsidera PR Horta minimiza prinsipiu Estadu Direitu.
Haktuir Jurista Sergio Dias Quintas ba jornalista sira iha Kaikoli, Kuarta (12/02/2025).
“Ita halo nomeasaun ba ema neebe mak nia naran rejistadu hela iha Tribunal hanesan arguidu, no ema neebe nia naran rejistadu hela iha Ministeiru Publiku, depois halo nomeasaun para asumi kargu publiku liu-liu hanesan Embaixador reprezenta Timor Leste nee. Hau hanoin Prezidente Republika minimiza buat ida prinsipiu Estadu Direitu, nee ladun diak,” dehan nia.
Sergio hatete, mezmu la espresamente hakerek iha norma ruma, maibe tuir etika deontolojia no moralmente, tuir lo-loos Prezidente Republika labele nomeia kualker sidadaun ida bainhira nia prosesu justisa sei rejistu iha Ministeiru Publiku ka Tribunal.
“Se ema ruma mak nia prosesu rejistadu hela iha Ministeiru Publiku tantu iha Tribunal, maibe nomeia ba iha kargu publiku ruma hanesan Embaixador nee, ita niminiza ita nia poder judisial rasik, minimiza servisu Ministeriu Publiku nian no minimiza Estadu Direitu,” nia tenik.
Nia afirma, tuir lo-loos Prezidente Republika hatene ida nee, karik nomeasaun nee diak ba estadu, tuir lo-loos haree ema neebe mak moos, katak ema laiha problema ho justisa, hodi hatudu ba sosiedade katak ema sira nee reprezenta estadu neebe laiha problema justisa ruma.
Jurista nee akresenta, serake ema iha Timor nee kapasidade laiha ona mak tenke nomeia ema balu deit. Timor agora nee rekursu umanus barak tebes, labele haree ba interese pesoal ou iha ligasaun diak mak nomeia deit ema sira nee.
Oras nee daudaun prosesu ida neebe iha Tribunal julgamentu sei lao hela, iha prosesu nee arguidu hamutuk nain sanulu resin tolu, inklui arguidu Antonio da Conceição, neebe momentu neeba hanesan Ministru MCIA.
Prosesu neebe lao hela, ligasaun iha tinan 2014 tinan 2015 no tinan 2016, Ministeriu Komersiu Industria Ambiente preve orsamentu Estadu ho naran fundu Suvensaun Publika hodi fo apoiu ba grupu benefisiariu 8 neebe halo sira nia atividade iha varias ekonomia neebe namkari iha munisipiu haat hanesan, Aileu, Ainaro, Manufahi no Kovalima.
(ter)
