DILI, STLTIMORLESTE.com – Prezidente Republika (PR), Jose Ramos Horta sei halo konsulta ho Governu antes nomeia Prezidente Tribunal Rekursu (PTR) foun.
Xefe Estadu dehan, ema neebe asumi kargu nuudar PTR labele iha politizasaun la inklina aan iha partidu politiku, tanba nee PR sei haree husi kurikulu akademiku.
“Hau sei konsulta ho Governu, buat sira nee tenke konsulta ho Governu ho orgaun judisial seluk karik hili kandidatu neebe diak liu PJR, nomos ba Prezidente Tribunal Rekursu, ba hau laiha politizasaun, laiha partidarizasaun, hau hakarak haree deit mak nia kurikulu akademiku, kurikulu profisional,” dehan Prezidente Republika Jose Ramos Horta ba jornalista sira, bainhira remata partisipa konferensia akademika reflesaun nasional sobre 50 anos Proklamasaun Indepedensia Timor Leste, iha Salaun UNTL, Kaikoli, Kuarta (09/04/2025).
Nunee mos husi Sosiedade Sivil sujere Prezidente hili feto bele lidera PTR, hatan ba kestaun nee Prezidente hatete, atu asumi kargu PTR la haree ba feto ka mane, maibe haree ba Kurikulu akademiku.
“Hau la haree ba feto ka mane, maibe hau haree ba nia kurikulu akademiku no kurikulu profisional no esperiensia, haree nia komportamentu tinan hira nia laran nee feto ka mane nia pozisaun iha kazu neebe refere ba konstitusionalidade nia defende konstituisaun ka nia monu ba partidarizasaun, nee mak hau haree didiak,” katak PR, Horta.
(eme)
