BAUKAU, STLTIMORLESTE.com – Diretora Diresaun Konservatoriu Servisu Rejistu Notariadu Munisipiu Baukau, Justina das Neves Mendonça rekonhese iha loron Sesta feira kada semana, hahu husi tuku 08:00 too 12:00 laiha atendimentu simu sidadaun sira nia dokumentus atu prosesa.
“Orariu taka kedas iha kuadru avizu iha Sesta nee dader ami limpeza, sira labele haree deit iha liur ami laiha ami iha laran hadia livru asentu neebe uza husi Segunda too Kinta iha armajen,” hateten Justina das Neves Mendonça ba STL iha nia knaar fatin Vila Nova, Baukau, Tersa (27/01/2026).
Nia katak, kada loron Sesta feira tempu servisu nian husi tuku 08:00 dader funsionariu no funsionaria sira halo limpeza iha areadores edifisiu nian no bainhira remata limpeza iha liur funsionariu no funsionaria sira kontinua limpeza iha uma laran no arkivu sidadaun sira nia dokumentus neebe submete ona iha edifisiu.
Nia komenta, sidadaun sira labele haree deit husi liur, maibe prezisa hatene mos servisu sira neebe funsionariu no funsionaria sira halao iha loron Sesta feira kada semana tempu servisu nian.
Nia argumenta, kada loron Sesta feira hahu husi tuku 08:00 parte dader too tuku 12:00 meudia, loloos iha atendimentu maibe razaun laiha pesoal limpezador atu limpeza iha areadores edifisiu nian, tanba nee deside funsionariu no funsionaria sira tenke halao servisu refere iha loron Sesta.
“Laos dehan la halo planu, dutante nee tau hela iha kestaun pedidu ami halo maibe ita nia Governu haree ba orsamentu no kliner nee la perioridade entuan ida nee husik hela ami labele halo buat ida,” katak Justina das Neves Mendonça.
Nia tenik, mezmu kada loron Sesta feira hahu husi 08:00 too 12:00 laiha atendimentu simu sidadaun sira nia dokumentus atu prosesu, tanba laiha orariu simu dokumentus, maibe iha loron Sesta funsionariu no funsionaria sira halao fali servisu hahu husi tuku 14:00 too 17:00 distribui sidadaun sira nia dokumentus neebe prosesu loos ona.
Tanba nee husu sidadaun sira atu komprende orariu servisu iha loron Sesta feira, tanba loron refere laiha atendimentu simu sidadaun sira nia dokumentus, maibe distribui fila sidadaun sira nia dokumentus neebe prosesu loos ona.
(tom)
