BAUKAU, STLTIMORLESTE.com – Durante fulan Novembru tinan 2024, Hospital Rejional Eduardo Ximenes (HoREX) Baukau rejistu Bebe moris hamutuk 136.
“Husi fulan Novembru, HoREX area maternidade nian Bebe Mane 64 pesoas no Feto hamutuk 72 pesoas, no ida mate iha inan nia kabun laran, restu nee moris hotu,” informa Xefe Departementu Area Obstritisia no Sirurjia, Bernardina Freitas Marcal ba STL iha HoREX Baukau, Segunda (23/12/2024).
Bernardina sublina, numeru bebe refere rejistu husi inan gravida nain 126, maibe iha inan balun rejistu bebe nain 2 ka bebe moris kaduak.
Nia fundamenta, numeru inan gravida refere nain 96 konsege hetan partus normal, nain 10 partus hetan ajuda husi material ventoja hodi partus no inan gravida nain 20 sejariana ka operasaun husi mediku espesialista sira.
“Inan sira mai atu partus mak ba fali sejariana, tanba iha indikasaun bebe toba sala ka nia aprezantasaun la loos, entaun tenke sejariana salva labarik, ida mate kabun laran iha infeksaun, maibe la dun ba halo tratamentu iha sentru saude sira,” Bernardina akresenta
Xefe Departementu nee argumenta, indikasaun inan gravida ba sejariana no bebe mate iha kabun laran, tanba inan gravida sira menus halo kontrola aan iha fasilidade saude.
Nunee husu inan gravida sira atu nafatin hakbesik aan ba fasilidade saude neebe besik hodi hatene kondisaun bebe iha kabun laran hodi hatene problema hetan atendimentu seluk labele afeta ba bebe mate iha kabun laran no labele afeta ba sejariana.
(EST 2)
