DILI, STLTIMORLESTE.com – Diretor Servisu Rejistu Notariadu, Agustinho Gonsalves Viera hatete, iha fulan Novembru nee nia laran kaderneta pasaporte rihun 20 sei too tan Timor Leste (TL).
Nia dehan, kontratu hotu ona ho Kompanhia Thales, hein fulan Novembru nee nia laran sira manda kaderneta Pasaporte balu mai ona, maibe depende pagamentu, kuandu pagamentu tama ona sira mos haruka mai ona. Dala ruma iha ona pagamentu ba sira no sira hatama atraza oituan, maibe agora sira garante katak fulan Novembru sira sei haruka mai.
“Sira sei haruka mai rihun 20 lae rihun 70 ba tinan ida nian, ho orsamentu US$ 500 mil. Maibe prepara mos atu husu stok foun, halo akizasaun no hatama pedidu foun fali, “dehan Agustingo ba jornalista sira iha Mandarin, Tersa (19/11/2024).
Agustinho hatutan, atendimentu pasaporte lao normal rejistu online, ba sira neebe mak la konsege rejistu online bele mai kontaktu ho sira hasai foto.
Iha fatik ketak, Akademiku UNTL, Rafael de Jesus dehan, importante kontinua halo kontratu no kompanhia hodi produs kaderneta atu labele akontese tan hanesan situasaun balu neebe antes nee akontese ona.
“Kaderneta pasaporte importante duni, tanba nee presiza tau iha planu hodi kontinua halo akizasaun foun hodi tau ba stok nian, atu labele akontese hanesan situasaun balu antes nee kaderneta Pasaporte hotu,” dehan nia.
Antes nee Ministru Justisa Sergio Hornai afirma, Governu liu husi Ministeriu Justisa planu sosa tan kadernta pasaporte, tanba garante ba stok kaderneta nunee labele difikulta sidadaun sira neebe presiza.
No iha tinan ikus 2024, governu planu hola kaderneta rihun 15.
(ter)
