DILI, STLTIMORLESTE.com – Numeru Juiz sira iha Tribunal seidauk sufisiente atu bele responde ba nesesidade justisa povu nia.
Prezidente Asosiasaun Maestradu Timor-Leste (AMTL), Juis Antoninho Gonsalves hatete, oras nee daudaun Juiz hamutuk 30 resin deit.
“Agora daudaun Juiz iha 30 resin deit, rua sai tiha maibe ita haree numeru neebe iha seidauk sufisiente,” dehan Antoninho ba STL iha nia knaar fatin Kaikoli, Dili, Kinta (09/01/2025).
Nia hatutan, maske rekursu umanu menus maibe atu produs rekursu umanus presiza lori tempu, laos produs deit, maibe produs lori tempu, atu rekursu neebe liu ba iha Majistradu tenke ho kualidade, atu foti desizaun ho kualidade no halo julgamentu sira mos ho kualidade.
Maske rekursu umanu menus maibe prosesu barak lao, tanba determinadu loron atu halao julgamentu ba iha Koletivu no Singular nian, ida nee prosesu lao, no prosesu singular iha Juiz balu nia prosesu tun, no koletivu mak seidauk.
Tanba Tribunal hirak neebe iha Tribunal Dili mak prosesu barak liu hamutuk rihun tolu, tanba nee Konselhu iha planu kuandu formadus sira neebe tuir hela formasaun iha Portugal fila mai sei aloka nain 8 iha Tribunal Dili hodi apoiu prosesu julgamentu kiik sira.
Iha fatin ketak, Akademiku UNTL, Rafael de Jesus dehan, ohin loron rekursu umanus iha setor justisa sei menus, tanba nee kauza prosesu pendente barak.
”Hau hanoin rekursu umanu menus mak kauza mos kazu pendente kontinua iha, tanba nee ba oin presiza aumenta numeru rekursu umanus, atu nunee bele redus prosesu pendente sira,” dehan nia.
(ter)
