DILI, STLTIMORLESTE.com – Oan kiak nain 6 hamonu matan-been bainhira Prezidente Republika liu husi Diresaun Servisu Sosiedade Sivil no Asuntu Sosial lansa uma ida ba oan kiak nain 6 hodi sira hamahan aan ba.
Prezidensia Republika liu husi Diresaun Servisu Sosiedade Sivil no Asuntu Sosial lansa uma ida ba oan kiak nain 6, Alicia Clara Barros, Joanico Clara Barros, Evencio Clara Barros, Idonia Clara Barros, Anacito Clara Barros, Luro Clara Barros. Iha Aldeia Riatu, Suku Daisua, Postu Administrativu Same Vila, Munisipiu Same.
Tuir Koordenadora Diresaun Servisu Sosial no Assuntu Sosial, Teresa do Santos Ximenes ba STL, Sesta nee (30/05/2025) hateten, objetivu ba lansa uma nee tanba iha proposta ida mai husi Instituisaun INDICA hamutuk ho autoridade lokal husi Xefe Suku Daisua halo proposta ida hatama ba Presidensial, no ekipa SSAS tun direta hodi survei, los katak alin oan kiak nain 6 nee presiza duni Prezidente nia tulun no Prezidente aprova hodi konstrui uma ida ba alin oan kiak nain 6 nee.
”Ohin halo deit lansamentu ba primeiru pedra, akompanha ho reprezentante PAM, reprezentante APA, INDICA, autoridade lokal no familia husi alin oan kiak nain 6,” dehan koordenoadora dehan wainhira ekipa SSAS too iha fatin, sira sente kontente tanba bele tulun ona sira hodi konstrui uma dignu ida ba sira nain 6, sira sente triste tanba tenke hasoru moris ida neebe mak todan tebes atu sira hasoru. Sira hatoo agradese no obrigada barak ba Prezidente tanba bele rona no tulun sira nain 6.
Nia hatete, apoiu hirak nee inisiativa Prezidente Republika nian atu fahe domin ba oan kiak nain 6 atu sira nain 6 bele hetan mahon ida diak nunee sira bele kontinua estudu iha fururu.
Nia hatutan, uma nee ho medida 8×7, iha haris fatin, dapur, kios, durasaun ba kontrusaun uma refere durante fulan tolu. Oan kiak nain 6 nee nia aman oho nia inan iha 14 fevreiru 2023, durante sira nia inan mate nia aman tama prizaun, sira nain 6 hela ho avo sira no avô sira mak tau matan ba sira nia nesesidade.
Hafoin lansamentu ba uma nee, oan kiak Alicia Barros ho matan-been hatoo agradese ba Prezidente Republika tanba bele apoiu ona Alicia ho nia alin nain 5.
“Agradese ba Prezidente Republika neebe bele rona ami nia halerik mai tulun ona ami,” dehan oan kiak Alicia.
Nunee mos Xefe Suku Daísua Amorin Da Costa hatoo agradese ba Prezidente Republika tanba bele tau matan ba oan kiak nain 6 neebe durante nee moris iha susar nia laran, nia informa hanesan autoridade sei buka meius atu fasilita oan kiak sira atu asesu ba edukasaun iha Munisipiu Same liu sira nia propinas kada fulan sei gratuita ba sira nunee sira bele kontinua estudu ba futuru.
Husi atividade nee Prezidente Republika Jose Ramos Horta liu husi nia pajina ofisial hatete, Prezidensial Republika sempre tulun oan kiak sira neebe laiha duni kbiit.
“Loron-loron tulun ita nia alin, ama no apa sira neebe sorte la iha kbiit la iha ba moris ho dignu oituan,
ajuda mai husi orsamentu presidensia, maibe mai mos husi Prezidente nia kolegas sira namkari iha mundu – Japaun, Korea, Australia, Honkong. Tulun mos loron-loron husi Prezidente nia vensimentu fulan-fulan, nee oituan la barak,” katak Horta.
PR Horta dehan, Alicia Clara Barros ho idade 17 hamonu matan-been hafoin simu ajuda uma ida husi Servisu Sosiedade Sivil no Asuntu Sosial Prezidenzia Republika, Same 29 Maiu 2025. “Lalika tanis oan Alicia, Prezidente sei ba vizita imi,” hakotu nia.
(eme)
