BAUKAU, STLTIMORLESTE.com – Diretor Servisu Diresaun Ministeriu Agrikultura Pekuaria Peska no Florestal (MAPPF) Munisipiu Vikeke, rekonhese oan rasik sai motorista ba nia, tanba atu asegura programa Governu iha baze.
Deklarasaun nee Diretor Servisu MAPPF Munisipiu Vikeke, Olivio S. Freitas ba STL liu husi telefone, hatan ba informasaun neebe Bankada FRETILIN liu husi Deputadu Dario Madeira aprezenta iha plenariu Segunda feira semana nee katak, Diretor Servisu MAPPF Munisipiu Vikeke abuzu poder, tanba la uza motorista neebe Governu rekruta ba asuntu servisu nian, maibe lori fali nia oan rasik sai motorista ba nia hodi atende asuntu servisu nian no pior tan Administrasaun Munisipiu Vikeke asina guia ka orden servisu ba oan neebe sai motorista.
“Sim hau lori hau nia oan ba lori kareta Estadu halo servisu Estadu, maibe laos permanente, tempu emerjensia no la manan osan, voluntariamente deit,” argumenta Diretor Servisu MAPPF Munisipiu Vikeke, Olivio S. Freitas ba STL liu husi telefone, Kuarta (26/03/2025)
Diretor nee katak, motorista ba kargu Diretor Servisu MAPPF Munisipiu Vikeke husi tempu UNTAET too ohin loron no kargu Diretor troka malu too ona dala-6, Governu liu husi Ministeriu seidauk halo rekrutmentu no kontratu pesoal motorista hodi destaka iha Edifisiu Servisu MAPPF Vikeke atu konduz kareta Estadu neebe iha.
Nia konta, husi kargu Diretor nain lima (5) ba mandatu kotuk nian, kada Diretor hatene lori kareta Estadu neebe destaka, nunee la difikulta servisu, maibe ba mandatu nee hanesan Diretor la hatene konduz kareta Estadu neebe iha, nunee fo impaktu ba servisu viajen ba dook nian, nunee tenke bolu oan rasik sai motorista hodi bele asegura servisu no programa Governu nian iha terenu.
“Hau dehan, institusional hau kontra regras, ida oan mai lori kareta nee, mais politikamente hau asegura IX Governu Konstitusional nia servisu,” nia akresenta
Nia sublina, oan rasik neebe sai motorista ho voluntariu no uza ba konduz kareta Estadu iha Servisu MAPPF Vikeke ba tempu emerjensia neebe nesesita duni, tanba nee tenke bolu oan rasik hodi konduz kareta, inklui asegura mos asidente.
Nia argumenta, mezmu laiha pesoal motorista ba kareta Estadu neebe atribui ba kargu Diretor iha Servisu MAPPF Vikeke, maibe antes nee mos utiliza pesoal extensionista no traktorista sira konduz kareta Estadu ba asuntu servisu nian, maibe daudaun tempu halai natar no pesoal extensionista no traktorista iha hotu natar laran, nunee obrigatoriu tenke bolu oan rasik, maibe iha tempu emerjensia deit.
Aleinde mos nia hatan, kona-ba deklarasaun Deputadu refere, neebe hateten Administrasaun Autoridade Munisipiu Vikeke asina guia ka ordem servisu (M.O.P) viajen husi Vikeke ba Dili ba oan motorista, hanesan Diretor Servisu Munisipiu tenke lori ba hodi Autoridade Munisipiu asina, tanba atu fasilita servisu emerjensia ho razaun oan rasik laos funsionariu Estadu hodi konduz kareta fasilita servisu Estadu.
“Nia fasilita deit servisu, la prosesa ba osan, neebe fasilita deit ordem ba Dili nee dala ida deit, ida nee mak ita halao, tanba nee hau sujere ba Deputadu nuudar Vikeke oan atu levanta buat ruma mai halo fiskalizasaun iha baze, haree saida mak akontese iha baze mak levanta, labele rona deit anin,” hateten Diretor nee.
Olivio katak, guia ka ordem servisu (M.O.P) neebe asina husi Autoridade Munisipiu ba viajen oan motorista nian husi Vikeke ba Dili, la prosesa ba akomodasaun (osan viajen) nian, maibe ordem servisu neebe Autoridade Munisipiu asina atu asegura deit bainhira viajen hetan asindente, tanba nee husu deputadu refere hatudu faktus.
Mezmu nunee, maibe Diretor nee obrigadu ba Deputadu Dario Madeira, tanba konsidera liu husi meius nee atu fanu ministeriu hodi tau matan ba Diresaun Servisu neebe laiha motorista.
(tom)
