DILI, STLTIMORLESTE.com – Ministru ba Asuntu Kombatente Libertasaun Nasional (MAKLN), Gil da Costa Monteiro “Oan-Soru” reprezenta Governu, Veteranu, Timoroan sira no povu doben Timor Leste tomak, hatoo omenajen ba forsa Australianu ho Novazelandes sira neebe dedika aan too mate iha funu durante operasaun sira ba manutensaun dame nian iha mundu no iha sira nian rain rasik.
MAKLN partisipa selebrasaun loron ANZAC nian ba dala-110 nee, tempu ida neebe naruk tebes, ba sofrimentu pasadu neebe povu sira sente, nee sai hanesan sakrifísiu boot ida ke sidadaun hotu-hotu labele haluha.
Kondisaun ho situasaun neebe Timor Leste hasoru, loron 25 fulan Abril ohin, mak bele fo ona dalan ba Timor Leste hodi hili ninia dalan ba ukun rasik aan no ohin halo tinan 51 iha loron 25 Abril mos.
“Mai ita hotu-hotu hamutuk hodi fo omenajen ba pasajen moruk neebe sira luta no hasoru liu tiha ona, tanba sakrifisiu neebe sira halo tenke sai memoria neebe horik iha ita nia sira nee nia moris no hatutan ba beibeik,” hatete Ministru “Oan-Soru” liu husi intervensaun iha serimonia komemorasaun loron ANZAC nian “Anzac Day” ba dala-110, neebe realiza iha kampu hasae bandeira nasional nian, edifisiu Konselhu Kombatentes Libertasaun Nacional (KKLN) Komoro, Sesta (25/04/2025).
Governante nee lori populasaun no veteranus sira iha Timor Leste hodi hatoo agradesimentu ba tinan 110 no omenajen ba profundu ba sira neebe aseita sakrifisiu iha tempu neeba.
Fatin hanesan, Embaixadora Australia, Caitlin Wilsom sublina, komemorasaun loron ANZAC sai ona hanesan tradisaun ida ba Nova Zelandia ho Australia, hodi halo reflesaun ida neebe klean iha neebe atu hanoin hikas sira hotu neebe servisu no mate iha funu hotu-hotu.
Observa iha loron 25 fulan Abril, tinan-tinan, loron Anzac orijinalmente dezeña atu fo onra ba membru sira husi Korpu Ezersitu Australia no Nova Zelandia nian (ANZAC) neebe servisu iha kampania Gallipoli, sira nia kompromisu dahuluk iha funu mundial dahuluk (1914-1918).
Istorikamente, loron Anzac marka aniversariu husii kampania dahuluk neebe hamosu vitima boot sira ba forsa Australianu sira no Neozelandes sira durante Funu Mundial Dahuluk. L Sigla ANZAC signifika Korpu Ezersitu Australia no Nova Zelandia nian, neebe nia soldadu sira konhesidu hanesan ANZACS.
Loron ANZAC sai nafatin hanesan okaziaun nasional ida neebe importante liu iha Australia no Nova Zelandia, maske nunee serimonia sira no sira nia signifikadu muda ona makaas dezde 1915.
(alb)
