DILI, STLTIMORLESTE.com – Daudaun nee Negosiante Ropa Obral (OB) iha Merkadu Manleuana la folin, tanba nee rendimentu menus.
“Ami negosiante faan obralan iha Merkadu Manleuana la folin, tanba nee rendimentu menus, hahu husi dader tuku 8:00 too 06:00 lokraik hetan mak US$ 1 deit, sei laiha loron ida ema la hola too fila ba uma,” hatete Negosiante Obralan iha Merkadu Manleuana, Abelita dos Santos Monteiro ba STL iha Merkadu Manleuana, Kuarta (16/10/2024).
Nia dehan, uluk ropa folin tebes, tanba komprador barak, loron ida osan inan hola ropa nee fila ona, aban mai kontinua faan hetan nia funan US$ 70, nee iha ona liman laran.
“Agora ropa tara too fulan rua tolu mos osan inan seidauk fila, lalika mehi ba funan, tanba loron ida ropa tahan ida mos ema la hola,” nia esplika.
Iha fatin hanesan, Negosiante Obralan Manleuna, Antonieta Amaral informa, maske kada loron sidadaun sira tama sai merkadu, maibe kompradores sira menus hodi difikulta tebes ba sira hetan rendimentu hodi sustenta ekonomia familia.
Nia informa, maske ropa obralan hirak nee sira sosa ho osan boot, maibe faan fila- fali ho folin neebe baratu, maibe nafatin la hetan rendimentu hanesan tempu uluk.
”Kuaze fulan rua ona menus kompradores, maske loron-loron ema tama sai iha merkadu laran, kompradores sira tama sai deit maibe la sosa ropa,” nia Informa.
Nia kompara rendimentu agora menus, tanba negosiantes obralan neebe antes faan iha Aimutin, Autoridade Munisípiu Díli muda hotu ona ba Merkadu Manleu, nunee halo sira susar tebes atu hetan rendimentu hanesan babain.
(jen)
