BAUKAU, STLTIMORLESTE.com – Servisu Munisipal Obras Publikas Baukau hapara ona projetu manutensaun estrada urbana Baukau Vila neebe implementa ho tipu cor iha parte Vila Nova neebe responsabiliza husi kompanhia lokal Roman Grigio, Unip.Lda.
Diretor kompanhia Roman Grigio, Unip.Lda, Estevão Paulo Sarmento esplika, dezisaun implementa projetu manutensaun ba estrada urbana Baukau Vila implementa ho tipu cor (plan concrit) orienta husi Autoridade Munisipiu Baukau ho Servisu Munisipal Obras Publikas, nunee parte kompanhia implementa servisu tuir orientasaun neebe iha, maibe servisu seidauk remata parte Obras Publikas Baukau hapara servisu, tanba razaun implementa projetu reabilitasaun atu hahu ona iha tempu besik.
“Hodi sira mak haruka ami servisu manutensaun konkrit rotunda Vila Nova sae ba Nagardjo, maibe ami cor ona mak derepente Obras Publikas Baukau hasai surat konkrit para lai, dehan area urbana Jova atu tama halo servisu ona, tanba nee ami para,” hateten Estevão ba jornalista sira iha Vila Nova Baukau, Sesta (30/05/2025).
Nia sublina, Obras Publikas Baukau hapara mak tipu cor estrada, tanba tuir planu kompanhia Jova atu implementa ona servisu reabilitasaun estrada urbana refere, maibe hanesan kompanhia manan nain ba projetu manutensaun sei kontinua halo servisu seluk hanesan levelin no grevel.
Tuir nain kompanhia nee nia hatene, projetu reabilitasaun estrada refere neebe katak atu responsabiliza husi kompanhia Jova, seidauk bele akontese iha tinan nee, tanba sei iha prosesu laran no tuir orientasaun husi Nasional projetu manutensaun kontinua implementa, maibe parte servisu Obras Munisipal hapara servisu.
“Hau konfirma tiha ona Nasional, Nasional la hatene lo-loos servisu nafatin, maibe sira hapara dehan Jova tama, maibe foin halo levantamentu, ida nee seidauk fixu estrada urbana halo tinan agora, maibe sira derepente para, nee hau triste,” Estevão argumentu.
Hatan ba kestaun nee, Diretor Servisu Munisipal Obras Publikas Baukau, Agostinho Ximenes katak, depende ba kontratu entre kompanhia ho Ministeriu no diresaun Nasional mak hatene asuntu refere, maibe tuir kontratu neebe iha implementa servisu manutensaun termina iha loron 01 Junhu 2025.
“Ita haree ba nia kontratu nee atu remata, mais depende ba nain projetu Obras Nasional atu kontinua ga hapara ita iha nee ita laiha kompetensia atu hapara kada kontraktor ida,” Agostinho katak
Entretantu projetu manutensaun estrada urbana Baukau Vila ho numeru kontratu MPW-W-230040, numeru tenderizasaun KP/EO/MOP/23018 ho valor orsamentu US$ 600,000.00 neebe kompanhia implementa servisu hahu iha fulan Janeiru tinan nee no servisu cor seidauk remata, maibe dadaun hapara.
Tuir observasaun STL nota iha terenu, projetu manutensaun neebe implementa husi kompanhia Roman Grigio cor ona parte balun maibe seidauk finaliza, tanba parte balun neebe kompanhia kee seidauk cor too hapara servisu.
(tom)
