BAUKAU, STLTIMORLESTE.com – Prezidente Autoridade Munisipiu Baukau, Veneranda Lemos hatete, Servisu Administrativu Autoridade Munisipiu Baukau nakloke ba komunidade sira iha Baukau, neebe iha ideias konstrutivu ba dezenvolvimentu nian.
Prezidente Autoridade Munisipiu Baukau hatoo deklarasaun nee, bainhira haree media sosial iha sidadaun inresponsabilidade sira lansa fotografer kompanhia implementador projetu manutensaun estrada urbana Baukau Vila, neebe liu husi trabalhador halo manutensaun ba estrada aat iha area planaltu besik rotunda Vila Nova cor ho sementi.
“Hau hatete beibeik, Baukau oan se deit mak hakarak fo nia kontribuisaun ideias ba dezenvolvimentu, mai deit, odamatan Autoridade Munisipal nee nakloke ba ema hotu para mai fo hanoin, labele komentariu negativus iha media hodi hatete cor ona taka keramik,” hateten Veneranda ba STL iha Vila Nova, Kinta (27/03/2025).
Autoridade masimu Munisipiu Baukau nee triste ho komentariu negasaun sira iha media sosial katak, cor ona hein taka keramik, komentariu nee Veneranda konsidera no deskonfia maioria mai husi Baukau oan rasik.
Nia katak, sente aan hanesan Baukau oan no sidadaun neebe iha hanoin kontribui ba prosesu dezenvolvimentu iha Baukau, Autoridade Munisipiu Baukau nakloke ba ema hotu atu fo hanoin ba Autoridade lalaok dezenvolvimentu neebe diak liu ba sidade Baukau, lalika hein kritika deit iha media sosial.
“Ba maluk Baukau oan sira, bele halo komentariu mais lalika tarata, se hakarak koalia mai saida mak imi hakarak, labele hakerek iha media komentariu taka keramik, se estrada bele taka keramik, imi ba taka uluk hau ba haree, se diak hau ba halo,” hateten Veneranda.
PAM Baukau nee konfesa, prosesu manutensaun estrada urbana Baukau Vila neebe daudaun akontese tipu cor ho sementi nee provizoriu deit, objetivu atu fasilita movimentu transporte publiku no privadu, tanba iha dalan neebe cor kondisaun aat no grave, tanba nee Autoridade Munisipiu foti insiativa koordena ho kompanhia implementador halo manutensaun cor ho sementi atu udan been lalika estragus, maibe mosu komentariu oin-oin.
Nunee Autoridade nee klarifika, projetu manutensaun cor ho sementi laos atu kompleta ka taka keramik, maibe fasilita komunidade nia movimentu ho transporte hodi prevene mos asidente.
Maibe kona-ba reabilitasaun estrada urbana Baukau Vila ho tipu asfaltu sei akontese iha tempu badak, tanba autoridade simu ona informasaun husi Ajensia Dezenvolvimentu Nasional (ADN) prosesu too ona faze avalia ona dezenhu, nunee bainhira avaliasaun remata, projetu reabilitasaun sei implementa.
Padre Parokia Igreja Santo Antonio Vila Antiga, Manuel Ximenes da Silva SDB hatete, relasiona preokupasaun kona-ba estrada urbana Baukau Vila neebe kompanhia cor ho sementi, maibe mosu komentariu oin-oin, nee diak, tanba dala ruma iha mos komentariu negativu atu fanu.
“Se mosu populasaun sira fo nia komentariu hasoru Autoridade, se karik iha buat ruma hanoin diak ba Autoridade diak liu ita fo hatene ba malu deit, du ke ita kritika iha liur,” hateten Padre Manuel.
Autoridade Parokia Igreja Santo Antonio Vila Antiga nee husu komunidade sira neebe iha hanoin konstrutivu bele hasoru direita Autoridade Munisipal iha edifisiu no fatin neebe deit hodi fo hanoin ba malu kona-ba kestaun Baukau nian diak, se tempu la biban atu hasoru malu, bele liu husi karta ofisial hodi dirije, tanba kritika malu iha media sosial nee laiha solusaun no konsidera lakon moral.
Entretantu estrada urbana Baukau Vila neebe atu hetan reabilitasaun iha tempu badak, sei hahu husi Vila Antiga too Vila Nova no kontinua remata rotunda Nagardjo portaun entrada sidade Baukau hamutuk Km 23.
(tom)
