DILI, STLTIMORLESTE.com – Prezidente Republika (PR), Jose Ramos Horta iha inisiativa halo Palasiu Prezidensial asisivel ba Publiku.
Prezidente Republika, Jose Ramos Horta nia inisiativa atu halo Palasiu Prezidensial Nicolau Lobato asesivel ba publiku hahu iha fulan hirak ikus nee.
Aleinde nee tuir observasaun neebe STL hetan iha Loron Tersa (15/04/2025) ho programa Kria Futuru, Palasiu simu labarik sira maizumenus nain 50 ba vizita guiada edukasional. Paseiu sira neebe organiza iha loron Tersa no loron Kuarta dader, lori grupu sira ho labarik nain 20-25 kada loron, akompanha husi profesor sira no kuidadu nain sira, hodi esplora edifísiu istoriku sira.
Simu vizitante sira iha entrada molok kontinua ba biblioteka Infantil nian, iha neebe rai hela literatura no rekursu edukasional sira Timoroan nian.
Hafoin nee kontinua ba Mini Zoo neebe furak, liu husi Jardin Amizade nian neebe foin harii (Jardim da Amizade) no iha parajen edukasional ida iha Espozisaun Dinozauru nian neebe kaptiva partisipante sira.
Esperiensia nee konklui ho hahan kmaan sira iha Kantina Matak, ho hahan modestu sira neebe fornese tuir orsamentu programa nian. Labarik sira barak neebe hela besik palasiu maibe nunka haree nia laran, iha oportunidade atu haree kona-ba instituisaun nasional importante ida nee.
Programa Kria Futuru reprezenta Prezidente Ramos Horta nia vizaun ba governasaun transparente no envolvimentu síviku neebe boot, estabelese, potensialmente, hanesan baze ba asesu publiku neebe barak liu tan ba Palasiiu Prezidensial iha futuru.
Hodi loke uluk espasu istoriku sira nee ba sidadaun timor nian, inisiativa nee hakarak haburas orgullu nasional no ligasaun ba instituisaun demokratiku nasaun nian.
(eme)
