DILI, STLTIMORLESTE.com – Organizasaun Juventude Demokratiku (OJD) iha loron Sabadu (28/06/2025) selebra loron aniversariu ba dala 24 ho tema “Jornada Juventude Demokratiku, Hamutuk Tane Partidu Demokrtiku” iha Sede Partidu nian iha Colmera, Dili.
Prezidente Partidu Demokratiku (PD) Mariano Assanami Sabino dehan, Juventude maka sai nuudar kontinuador ba konstrusaun estadu iha futuru, tanba nee husu ba joven sira atu dezenvolve aan iha setor oi-oin iha nasaun ida nee ba dezenvolvimentu nasaun Timor Leste iha futuru.
“Hau apresia ba Juventude Partidu Demokratiku, tanba kada tinan 5 halo kampanha PD laos atu buka votus maibe kampanha ba sidadania, kampanha para afirma, ema tenki hamriik, luta kontinua, tanba nee juramentu PD nian maka hau prontu atu hatutan espritu funu nain sira hodi konstrui estadu de direitu demokratiku neebe proklama husi eroi sira. Tanba nee, hau nia mensajen iha loron aniversariu Juventude PD maka nee, primeiru hatoo parabens ba juventude demokratiku sira hotu neebe maka esforsu, hakaas aan hodi kontribui ba dezenvolvimentu. Segundu hau hatoo parabens ba Juventude iha Timor Leste (TL) laran tomak, liu husi juventude Partidu Kongresu Nasional Rekonstrusaun Timorense (CNRT) ho juventude Partidu Libertasaun Popular neebe maka ohin partisipa iha selebrasaun aniversariu JPD,” dehan Assanami liu husi ninia diskursu iha Sede Partidu Demokratiku Colmera Dili, Sabadu (28/06/2025).
Nia haktuir tan katak, juventude tenke iha paradigma foun ba konstrusaun estadu, juventuda tenke kontinua mantein iha konstrusaun da Paz no juventude tenke kontinua mantein forma ninia aan, forma nia alin sira, forma nia jerasaun para nafatin iha karakter asuwain, karakter kontinuador, karakter lutador.
“Hau husu ba Juventude Partidu Demokratiku, Juventude Partidu Libertasaun Popular, Juventude CNRT nomos juventude sira husi partidu sira seluk iha rai doben ida nee, tenke kontinua buka malu nafatin hodi diskuti no debate, tanba ita iha diferensia idea no diferensia politiku, diferensia partidu oi-oin, maibe ita tenke iha vizaun ida katak, nasaun ida nee tenke diak liu ba oin, nasaun ida nee tenke puru liu, nasaun ida nee tenke forte liu no nasaun ida nee tenke sai nasaun ida neebe util ba povu tomak,” haktuir nia.
Nia haktuir tan katak, nasaun TL, nasaun demokratiku, tanba nee tenke iha partidu ho prinsipiu, karakter hodi defende, tanba nee lider iha partidu tenke metin, tanba ukun nee hanesan oportunidade atu serbii, mai husi ideolojia partidiu, prinsipiu partidu no programa partidu, tanba nee kuandu tama ona iha kuadru, militantes bele tama ba mai, votantes bele ba mai, maibe kuadrus partidu tenke hamrik metin, kuadrus nee labele kecewa tanba la hetan jabatan hahu muda aan ona ba partidu seluk, partidu laos atu fo benefisiu ba aan rasik maibe partidu ejiste tanba programa, tanba prinsipiu no tamba ideolojia.
“Hau husu ba Juventude Partidu Demokratiku katak ideolojia nee nia abut nee tenke metin too iha nivel kraik, tanba ita kompremetidu ona katak ba o Timor maubere oan, hau prontu atu serbii, ita promete ona ba asuwain sira dehan, ita prontu atu hatutan esperitu asuwain sira liu husi juramentu iha partidu Demokratiku ho juramentu katak hun ida, abut ida, povu ida rai Timor ida deit, tanba nee ita Timor oan hotu tenke orgulhu nuudar forsa Timor oan,” haktuir nia.
Iha oportunidade hanesan Visi IV Sekretariu Jeral Organizasaun Juventude Demokratiku, Julio Soares hatoo relatoriu selebrasaun loron aniversariu organizasaun Juventude Demokratiku ba dala 24, expresa agradese ba lider inisiador no fundadores partidu Demokratiku tomak, tanba ho sira nia matenek no sabedoria neebe aas, ba harii partidu ida nee maka ohin organizasaun Juventude demokratiku bele eziste iha nasaun TL, hodi kontinua haklaken Partidu Demokratiku ba povu no nasaun TL.
“Hanesan ita hotu hatene katak, aniversariu Organizasaun Juventude Demokratiku loloos nee ita selebra iha loron 20 de Junhu, maibe tanba preokupasaun balun, maka foin ita realiza iha ohin loron 28 de Junhu 2025, tanba nee OJD kontinua priense atividades lubun ida hahu husi loron 18 de Junhu, halo vizita no fo tulun ba Madre sira iha H-Education, misa agradesimentu neebe ita halao iha Igreja Motael, vizita Primeiru Prezidente Partidu Demokratiku, Kompanheru Fernando Lasama de Araujo nia rate iha Semiteriu herois da Patria Metinaro, Kuda Ai Parapa iha Liquica, no ohin ita realiza loron aniversariu OJD iha Sede Partidu Demokratiku Colmera Dili,” dehan Julio Soares.
Iha okaziaun hanesan, Sekretariu Jeral Demokratiku, Feliciano Quintas do Ceu nomos lori Prezidente Juventude demokratiku ho estrutura tomak, agradese ba Nai Maromak.
“Hau hanesan Sekretariu Jeral Juventude Demokratiku, lori naran Juventude Prezidente Juventude Demokratiku agradese ba Nai Maromak, tanba ho nia ilhas, sabedoria ba lider Partidu Demokratiku no fundadores partidu demokratiku, bele eziste organizasaun ida ho naran Juventude Demokratiku neebe prezide husi prezidente Juventude Demokratiku dahuluk husi kompanheiru Alito Rambo husi tinan 2001, depois mandatu remata, kontinua husi Kompanheiru Filipus Nino Pereira nuudar Prezidente Segundu Juventude Demokratiku hahu husi tinan 2003 too 2011. Hafoin ida nee kompanheiru Nivio Magalhaens kontinua ba Terseiru Prezidente Juventude Demokratiku no hau hanesan Sekretariu Jeral Juventude Demokratiku husi tinan 2012 too 2017 no ami nain rua kontinua assume knaar nee too ohin loron,” dehan nia.
Nia dehan, hahu husi tempu neeba, ezistensia Organizasaun Juventude Demokratiku, laiha buat ruma, laiha fundus, maibe ho esperitu de rezistensia, vontade, matenek no korajen husi Partidu Demokratiku bele forma Organizasaun Juventude Demokratiku bele firme husi tinan 2000 too ohin loron.
Iha ambitu selebrasaun loron aniversariu Organizasaun Juventude Demokratiku ba dala 24, Prezidente Partidu Demokratiku, Mariano Assanami Sabino ho estrutura, atribui sertifikadu apresiasaun ba lideransa fundador estrutura Organizasaun Juventude Demokratiku ho membru sira hamutuk 30 ital, koa keek, sunu lilin Aniversariu, han kalan hamutuk no konvivio hamutuk maka foin fahe malu.
(jos)
