DILI, STLTIMORLESTE.com – Orsamentu Jeral Estadu (OJE) 2025 ho montante US$ 2.6 bilhões la benefisia ba povu, maibe benefisia deit ba lider sira, tanba alokasaun barak liu ba veteranus hodi goza deit, futuru sei husik hela tusan ba jerasaun foun no aban bainrua nasaun sei bankrut.
Kestaun nee hatoo husi Diretor Ajar, Jose Luis Oliveira ba STL liu husi telefone, Sesta (08/11/2024).
Nia hatete, tuir nia haree agora deit TL iha ona tusan, tanba konstrusaun estrada sira nee mos deve deit osan mak hodi halo.
“Agora deit ita iha tusan tiha ona, tusan deit sae tiha ona ita, tanba ita ba deve osan halo estrada Dili-Ainaro, Dili-Baucau, Dili-Batugade. Ida nee mos deve mak hodi halo, maibe agora estrada komesa kuak fali ona, maibe ita seidauk selu osan deve nee, agora osan iha fundu minarai mos atu hotu, la hatene aban bainrua husik hela saida ba jerasaun foun aban bainrua, agora katuas sira buka goza ba sira nia aan deit, ita haree husi orsamentu agora nee alokasaun ba veteranus sira barak demais, enkuantu ba jerasaun foun ba edukasaun no kria empregu ba jerasaun foun laiha,” katak nia.
Diretor dehan, jerasaun tuan luta liberta rai ida nee para sira mak hodi goza rasik, maibe la hanoin kona-ba jerasaun foun, tanba bainhira sira idade ona lori rai nee mos ba ona bankrota.
“Katuas veteranus sira luta liberta rai ida nee para sira mak goza rasik, sira la hanoin kona-ba jerasaun foun aban bainrua sira mate rai nee mos bankruta no rai nee mos bele integra fali ba rai seluk, politika kuandu gasta osan nee orienta deit ba sira nia aan, sira haluha tiha katak futuru nasaun nee iha jerasaun foun nia liman, maibe sira la aloka osan neebe mak sufisiente hodi kria kondisaun ba jerasaun foun, maibe osan halai hotu ba sira,” katak Diretor nee.
Nia hatutan, banku mundial mos fo ona samada atensaun ba Timor katak iha ona dalan rai naruk fiskal, tanba Orsamentu Jeral Estadu nee depende ba fundu minarai, enkuantu fundu mina rai Bayu Undang hotu ona, Bayu Undang la produs ona entaun la too tinan 10 TL bankrut ona.
Diretor dehan, la too tinan 10 TL bankrut ona, se osan laiha atu finansia estadu, entaun estadu nee atu halo nusa nee buat ida seriu tebes, deputadu no deputada sira iha parlamentu mos hanoin deit ba sira nia aan hodi sosa karreta foun ba aan no salariu boot, asesor sira simu salariu boot la halo servisu.
Nunee mos Diretora Ezekutiva FOKUPERS, Domingas Afonso Amaral sujere diak liu ukun nain sira haree uluk ba povu nia moris, tanba oras nee daudaun povu barak sei moris iha terus nia laran.
“Povu barak sei moris terus dala ruma atu hetan deit hahan bikan ida, loron ida mos susar, kondisaun estrada sei aat iha area rural, sidadaun sira no feto sobrevivente sira atu lori deit hahan ba merkadu mos susar no dezafiu, tanba kondisaun infraestrutura neebe la permite no labarik barak mos seidauk asesu ba eskola rasik, tanba moris kiak no mukit, no kondisaun eskola mos seidauk iha kondisaun dignu,” katak Diretora.
Tanba nee, nia sujere ba ukun nain sira tau orsamentu neebe mak boot ba hadia povu nia moris, bainhira povu moris diak ona mak haree fali ba aan.
(eme)
