DILI, STLTIMORLESTE.com – Sosiedade Sivil Luta Hamutuk konsidera Orsamentu Jeral Estadu (OJE) 2025 nee fo kontente ba ukun nain no membru Governu deit, tanba benefisiu ba povu kiik laiha.
Kestaun nee hatoo husi Diretor Ezekutivu Luta Hamutuk, Jose Alves ba STL iha salaun Fokupers, Farol, Dili, Segunda (11/11/2025).
Tanba tuir sira nia haree, Orsamentu Jeral Estadu tinan 2025 neebe mak ho montante bilhaun US$ 2.6 nee so mente hariku no halo kontente ukun nain deit, maibe povu kontinua moris iha terus nia laran.
“Orsamentu Jeral Estadu 2025 ladun iha alokasaun diak no boot ba setor produtivu sira, ita iha jeneralidade laiha mudansa ruma neebe agora ita haree katak, OJE 2025 nee ita hasai osan boot para atu han deit, fahe malu, han deit, afinal ita iha situasaun ekonomia neebe mak difisil, lo-loos nee tenke iha orsamentu neebe mak aloka ba iha investimentu ekonomia, maibe ida nee ita la haree, neebe hau dehan deit OJE 2025 osan fo kontente ba ukun nain sira, ba grupu sira neebe haleu ukun nain sira, maibe povu sei nafatin hetan susar no terus tanba sei la kria kampu trabalhu barak dezempregu sei aumenta, setor ekonomia sira sei mate,” katak Diretor Luta Hamutuk nee.
Tinan 2025 tuir nia laiha diferente ho tinan hira kotuk ba, tanba laiha benefisiu ba povu. Se OJE 2025 fo benefisiu ba povu ida nee liu husi ekonomia povu ida nee karik, tau osan iha setor importante hanesan agrikultura tenke hasae maibe realidade laiha.
Nunee mos Diretor Ezekutivu FONGTIL, Valentin Da Costa Pinto hatutan, husi FONGTIL nia haree diskusaun loron 3 iha Parlamentu Nasiona iha jeneralidade pasa tiha ona nee kerdijer sei mantein ho US$ 2.6 bilhões.
“Ami nia esperansa mak nee, konsidera ona 2025 nee hanesan ano implementasaun, nee kerdijer sira tenke eleva duni sira nia ezekusaun ho diak lori mudansa ba dezafiu sira neebe hasoru,” hatete Valentim.
(eme)
