DILI, STLTIMORLESTE.com – Orsamentu Jeral Estadu (OJE) 2025 neebe Ministeriu Juventude Desportu Arte no Kultura (MJDAK) preve US$ 9.472.726, hodi finansia ba programa prioridade tolu.
Programa prioridade tolu mak hanesan programa institusional, inkluzaun sosial, kultura no patrimoniu.
“Ami Ministeriu Juventude Desportu orsamentu 2025 ami propoin US$ 9.4 milhoes, kompara ho tinan 2024 ami sae ituan kuaze 12%, tanba iha 2024 ami hetan 8.4 milhoes. Orsamentu 2025 ida nee ita konsentra ba iha programa tolu,” dehan Ministru Juventude Desportu Arte no Kultura, Nelia Isaac Sarmeto hafoin remata audiensia publika ba proposta OJE 2025 husi ministeriu nian ho komisaun G neebe trata asuntu edukasaun, juventude, kultura no sidadania, iha eis Ministeriu Finansas, Kinta (24/10/2024).
Nia esplika, pograma prioridade iha Orsamentu Jeral Estadu 2025 mak hanesan, dezenvolvimentu institusional ho funsionamentu institusional, nee koalia konaba bens servisu, hadia manutensaun ba kampu sira neebe eziste, iha Gleno, Bobonaro, Baukau no iha Dili, Inklui manutensaun ba edifisiu MJDAK nia rasik.Ba inkluzaun sosial nee, apoiu ba halo servisu area Juventude desportu no arte kultura nia, liu-liu kona-ba formasaun ba joven sira, kompetisaun desportiva, ho fasilidade desportiva sira.
Governante nee akresenta Kona-ba programa kultura no patrimoniu, nee sei apoiu ba grupu kultura ninia, kona-ba festival kultura sira nia, programa formasaun ba eskola sira, biblioteka iha mos pintura inklui muzika.
(mar)
