DILI, STLTIMORLESTE.com – Prezidente Republika (PR), Jose Ramos Horta husu atu iha Orsamentu Jeral Estadu (OJE) 2026 nee Governu presiza tau prioridade ba infraestrutura bazika sira iha zona rural, atu nunee povu bele hetan benefisiu.
Xefe hatoo kestaun nee ba jornalista sira, bainhira remata halao enkontru ho Primeiru Ministru, Kay Rala Xanana Gusmao iha Palasiu Prezidensial Nicolau Lobato, Bairo Pite, Dili, Kinta (14/08/2025).
“Governu nia prioridade neebe mai husi Governu aprovadu iha 2023 nee diak, Primeiru Ministru koalia dala hira ona katak 2025 mak aranka ba programa infraestrutura, infraestrutura mos inklui estrada rural nee inportante tebes, tanba ita koalia kona-ba edukasaun no agrikultura nee tenke hanoin ba infraestrutura iha zona rural para hadia estrada ba aldeia no suku hodi fasilita estudante no joven sira nia movimentu, nunee Tum Tum ho Mikolet tama, hau hanoin nee mak prioridade ida,” dehan PR, Horta.
Prezidente Republika hatete, Governu presiza tau matan didiak mos ba merenda eskolar, no Primeiru Ministru mos hatete ona katak Governu buka hadia merenda eskolar, no tenke haree mos kondisaun bee moos iha Dili too suku no aldeia sira.
“Hau koalia ho maun boot problema infraestrutura iha Fronteira, Fronteira nee ita haluha loos, zona Fronteira nee munisipiu no sub distritu iha Fronteira nee mak tenke prioridade, maun boot ba duni too Suai, maun boot hatete ba hau, tinan sira nee la konsege ba maibe foin ba duni nia promote 2026 tau orsamentu ba infraestrutura iha fronteira tomak para hadia estrada sira iha neeba,” katak Horta.
Xefe Estadu afirma, Governu bele halo poupansa barak tanba oras nee gasta osan barak, pur zemplu Prezidente simu pose asumi kargu nuudar Prezidente 2022 seidauk sosa kareta foun, maibe sosa deit mak mini bus ba atividade neebe presiza no trek rua hodi tula sasan ba povu.
PR Horta hatete, presiza koa osan ba kombustivel ba karreta estadu tanba oras nee dadaun osan menus dadaun ona, no presiza haree mos osan ba viajen ba membru Governu sira.
Aleinde nee iha revizaun Orsamentu Jeral Estadu 2026 membru Governu barak mak husu orsamentu adisional, maibe hakarak selu deit ba funsionariu oinsa Prezidente nia hanoin ba ida nee hatan ba kestaun nee PR Horta hatete, orsamentu adisional klaru iha prosesu, orsamentu nee laos simples tenke justifika tanba Primeiru Ministru tuur hela oin.
(eme)
