DILI, STLTIMORLESTE.com – Primeiru Ministru (PM), Kay Rala Xanana Gusmão informa ba Prezidente Republika, Jose Ramos Horta katak, Orsamentu Jeral Estadu ba tinan 2026 hatama ka submete ona ba Parlamentu Nasional (PN) no iha loron 5 Novembru hahu halao diskusaun.
Bainhira remata hasoru malu Primeiru Ministru, Kay Rala Xanana Gusmao ba jornalista sira, iha Palasiu Prezidensial, Nicolau Lobato, Bairru Pite, Dili, Kinta (15/10/2025) hatete, kada semana semana sempre halai enkontru ho Prizente Republika, maibe semana kotuk Prezidente ba tiha Portugal vizita ida fantastika, Governu no ema hotu simu Prezidente ho diak nee hori uluk kedas.
“Hau mai informa ba Prezidente Republika katak, hatama tiha ona orsamentu ba Parlamentu Nasional iha loron 1 fulan Outubru no loron 5 fulan Novembru nee hahu diskusaun Jeneralidade depois too 24 Novembru ultimu dia de diskusaun kala iha neeba aprova ona 25 sei haruka mai Prezidente atu promulga,” dehan Primeiru Ministru.
Iha biban nee Primeiru Ministru informa mos ba Prezidente Republika kona-ba Timor Leste nia preparasaun adezaun ba ASEAN ha fulan Outubru tinan nee, tanba adezaun nee mos laos fasil komplikadu maibe buat hotu tenke prepara.
“Hau mos informa ba Prezidente katak, ita halo hela ita nia preparasaun atu tama ba ASEAN laos fasil komplikadu, maibe buat hotu ita tenke prepara iha setor legal nia ita prepara hotu ona, neebe hein deit iha nee mos depois ita tama tiha ita hatene katak reuniuan barak,” dehan Primeiru Ministru, Xanana.
Nunee mos iha loron kuarta Governu aprova mos projetu Rezolusaun Governu, neebe aprezenta hosi Ministru Negosius Estranjeirus no Kooperasaun no Visi Ministra ba Asuntus ASEAN, Milena Maria da Costa Rangel, kona-ba kriterius dezignasaun no garantia kontinuidade pontu fokal Timor-Leste nian ba ASEAN.
Rezolusaun Governu nee estabelese kriterius ba dezignasaun no substituisaun pontu fokal neebe responsavel ba koordenasaun teknika no institusional entre Ministerius no Sekretariadu Nasional ASEAN nian, hodi garante estabilidade, koerensia no kontinuidade reprezentasaun teknika Timor-Leste nian iha prosesu adezaun no integrasaun plena ba organizasaun rejional nee iha futuru.
Rezolusaun nee prevee katak Ministeriu no entidade publika ida-idak dezigna pontu fokal prinsipal ida, neebe responsavel atu reprezenta Timor-Leste iha sorumutu sira funsionarius importante nian, no pontu fokal suplente nain-rua, neebe responsavel ba partisipasaun iha grupu traballu no sorumutu tekniku sira, neebe bele mos substitui pontu fokal prinsipal nee bainhira presiza.
Define mos kriteriu selesaun neebe klaru, bazeia ba autoridade institusional, kompetensia teknika, profisiensia linguístika, kapasidade koordenasaun no kompromisu hodi defende interese nasional.
Ministeriu Negosius Estranjeirus no Kooperasaun, liuhosi Vise-Ministra ba Asuntus ASEAN, sei koordena prosesu atualizasaun, komunikasaun no akompañamentu ba pontu fokal ho Diresaun-Jeral ASEAN no instansia rejional kompetente sira.
Jornalista: Emerenciana Pinto
Editora: Carme Ximenes
