DILI, STLTIMORLESTE.com – Orsamentu Jeral Estadu (OJE) mak nuudar raan ba prosesu dezenvolvimentu nasional, tanba nee presiza kuidadu no utiliza ho diak tuir kondisaun povu nian.
“Ita haree montante orsamentu ba tinan 2025 nian montante boot, bilhaun US$ 2,6, signifika volume orsamental nee apropriadu atu bele halo dezenvolvimentu, tanba orsamentu sira nee nuudar forsa no raan ba dezenvolvimentu nasional, nunee presiza utiliza tuir lei haruka,” hatete Akademika Universidade da Paz (UNPAZ), Florencio de Sousa.
Montante orsamentu neebe prepara tuir nia, hodi kondisiona ba prosesu dezenvolvimentu iha tinan 2025 nian, presiza tau prioridade ba setor potensial sira, liu-liu setor turizmu, agrikultura no setor sira seluk, daudaun nee aleja.
Orsamentu nee kuandu aprova nia funsaun mak atu uza hodi rezolve nesesidade no aspirasaun povu nian, katak problema saida mak povu nee enfreta, tanba OJE nuudar raan povu nian, presiza utiliza hodi fo kondisaun diak povu iha teritoriu nasional.
“Ita labele hanoin deit mak gasta, maibe retornu atu fila fali laiha, entaun ezekusaun ba prosesu dezenvolvimentu nee falha, tanba nee husu atu orgaun estadu bele kuida orsamentu sira nee ho diak,” nia dehan.
Tanba Orsamentu bilhaun US$ 2.6, sei aloka ba Administrasaun Sentral, ba Rejiaun Administrativa Espesial Oekusi Ambeno (RAEOA), seguransa sosial, inklui fundu rezerva seguran Sosial nian. Montante ida nee inklui alokasaun ida ho bilhaun $ 2,07 ba Administrasaun Sentral no milhaun US$ 62 ba RAEOA.
Iha fatin seluk, deputada husi komisaun C, Maria Angelina Lopes Sarmento afirma, Orsamentu Jeral Estadu nee nuudar raan estadu, presiza utiliza ho dignu.
Objetivu husi orsamentu sira nee presiza utiliza hodi halo investimentu ba setor produtivu sira, oinsa bele potensializa no promove setor Timor Leste ho dezenvolvidu, tanba nee husu atu uza orsamentu refere tuir nesesidade povu nian.
Aleinde nee Diretor Ezekutivu, Forum Organizasaun Noun Governamental Timor Leste (FONGTIL), Valentim da Costa Pinto “Coco” relata, bazeia ba panorama orsamentu tinan 2025 ho montante bilhaun US$ 2.6 tenki jere tuir nesesidade povu nian, tanba kondisaun iha sosiedade presiza atu dezenvolve ho diak.
“Ita husu atu OJE ida nee presiza halo ezekusaun masimu, tanba kompara ho orsamentu 2024 nian ezekusaun kiik, nunee investimentu ba setor produtivu sira iha terenu nafatin kontinua mosu.” nia sublina.
(EST 1)
