DILI, STLTIMORLESTE.com – Negosiante Mina Rai, Estanislau Soares konsidera Oknum Jestaun Merkadu Munisipiu Dili naok mina rai neebe nia faan iha dalan ninin, tanba laiha konhesimentu.
“Sira mai husu hau fo, maibe hau ba tiha uma halo kafe, hau fila mai mina rai masa rua lakon, hau husu sira se mak ohin hola mina rai karik, sira dehan karreta mutin ida mak para iha nee mais tun husi karreta foti mina rai masa rua nee liu kedas, nee Estadu mak haruka nusa la lori hotu ba, mais hanesan ema naok mai foti deit masa rua ba liu kedas,” hatete Estanislau ba jornalista sira iha dalan ibun Aimutin, Dili, Kurta (08/1/2025).
Negosiante nee ba Loja Xineza nee husu CCTV, tanba nia konsidera sasan lakon, depois loja nain fo CCTV ba negosiante nee posting iha Media Sosial.
“Hau husu CCTV tanba hau nia sasan lakon, mina rai masa rua mak lakon, ita dehan estadu mak haruka, Estadu mak haruka nee foti hotu kedas, laos foti deit masa rua deit, vídeo viral nee hau mak posting duni,” nia dehan.
Tanba tuir nia, mina rai neebe nia faan iha dalan ninin nee durante tinan 2016 too agora, hodi sustenta nesesidade uma laran no selu nia alin sira nia eskola.
Iha fatin hanesan, Xefe Departamentu Jestaun Merkadu Munisipiu Dili, Joaqmin Alves B. M. Belo esplika, iha loron 07 fulan Janeiru tinan 2025, Xefe Departamentu Jestaun Merkadu Munisipiu Dili fo orden no sira halao servisu iha terenu, negosiante ida faan mina rai iha espasu publiku, tanba nee Segurasan Jestaun Merkadu Munisipiu Dili nian foti mina rai masa rua hodi tau ba karreta laran, sira foti deit masa rua tanba ho razaun fo hanoin deit labele faan iha espasu publiku.
“Ita prende masa ida rua para fo hanoin deit labele faan iha espasu publiku, ita nuudar Timoroan iha sentimentu, tanba ami foti barak nee laos ami mak lakon, tanba hanesan ema humanu, no ami servisu Dekretu Lei Nú.33/2018 loron 27 Agostu, kona-ba ijiene no orden publika, bandu vendedór ambulante halo negósiu iha espasu publiku, la liu fora de lei nee rasik,” nia esplika.
Nia hatutan, sira ba ameasa loja nain neebe ema Estranjeiru Xineza ida tenke fo CCTV, no sira posting iha media sosial hodi trata Seguransa Jestaun Merkadu Munisipiu Dili nian ho liafuan naok mina rai.
Nunee mos Komandante Operasaun Komando PNTL Munisipiu Dili, Inspetor Xefe Polisia, José Luís Amaral informa, kona-ba preokupasaun Negosiante sira nia neebe posting video neebe Jestaun Merkadu Munisipiu Dili prende mina rai iha area Aimutin nian, ohin Eskuarda Dom Alexo Munisipiu Dili nian husu ba Jestaun Merkadu Munisipiu Dili atu mai presta deklarasaun.
(jen)
