DILI, STLTIMORLESTE.com – Desizaun Tribunal nian sai hodi aplika pena prizaun tinan 6 fulan 6 ba kondenadu inisial MM, neebe hanesan oknum PNTL, tanba nee defeza sei halo rekursu.
Tuir Defensor Publiku, Eustaquio Guterres katak, prosesu nee tranzitu injulgadu no Tribunal aplika pena efetivu tinan 6 fulan 6 ba kondenadu, maibe sei iha dalan atu halo rekursu, nunee defeza sei prepara hodi halo rekursu estraordináriu.
“Membru Polisia neebe hetan pena prizaun tinan 6 fulan 6, inisiu nee Advogadu Privadu mak kaer, depois kondena nia familia rasik hasoru hau iha ami nia eskritoriu, atu haree fila fali prosesu nee, prosesu nee tranzitu injulgadu ona, maibe hanesan defeza sei haree atu halo rekursu estraordináriu ba iha prosesu ida nee,” dehan Eustaquio ba STL iha Tribunal Kaikoli, Dili, Kuarta (16/04/2025).
Nia hatutan, oras nee daudaun prepara hela atu halo rekursu estraordináriu ba membru polisia neebe hetan prizaun tinan 6 fulan 6.
Tanba rekursu extraordinariu lei fo dalan, kuandu iha faktus foun aprezenta, maibe labele mai ho faktus anterior, tenke mai ho faktus foun. Signifika faktus foun neebe iha, defeza ka advogadu bele hatama rekursu extraordinariu ba iha Tribunal, atu Tribunal haree fali faktus foun nee hodi haree ida nee loos ka lae.
Defeza akresenta, hanesan defeza simu hodi halo rekursu estraordináriu, signifika iha faktus foun, tanba se faktus foun la iha sei la simu hodi halo rekursu estraordináriu.
Tuir kronolojia katak, oknum refere oras nee daudaun hanesan eskoltu seguransa ba Visi-PPN.
Onknum refere hetan prizaun tanba envolve krimi uza arma tiru sidadaun iha Tasi Tolu iha tinan 2021.
Oknum refere kumpri mandadu Tribunal nian, hodi tama iha Prizaun Bekora iha loron Tersa (08/04/2025) iha oras tuku 13:30.
Prosesu nee, Tribunal Judisial Primeira Instansia Dili (TJPID) liu husi Juiza prosesu, Ercilia de Jesus hasai ona desizaun mandadu hodi Autoriza autoridade Polisial lori arguidu MM ba Kondusaun Estabelesimentu Prizaun Bekora iha loron Tersa (08/04/2025).
(ter)
