DILI, STLTIMORLESTE.com – Embaixada Indonezia iha Timor Leste, Okto Dorinus Manik hatete, durante lider nasaun rua hasoru malu iha Jogja-Indonezia buat hotu lao hakmatek no iha ambiente pas, tanba rai rua iha espíritu ida deit hakarak rezolve problema fronteira.
Kestaun nee hatoo husi Embaixada Indonesia iha Timor-Leste, Okto Dorinus Mamik ba jornalista sira, bainhira remata halao enkontru ho Prezidente Republika, Jose Ramos Horta iha Palasiu Prezidensial, Nicolau Lobato, Bairru Pite, Dili, Kuarta (17/12/2025).
“Ami hasoru malu iha Jogja buat hotu lao hakmatek no diak, hahu ona hasoru pozisaun no hasoru malu halo enkontru ho atmosfera familia no laiha debate neebe naruk, tanba rai rua iha esperitu neebe hanesan atu rezolve fronteira, ida nee forsa hamutuk no esperitu ida hakarak rezilve problema neebe iha nunee diak ba nasaun rua tanba nee hasoru malu ona,” dehan Embaixador Indonezia iha Timor Leste nee.
Embaixador hatutan, foin lalais hasoru malu ona ba segunda ronde no sei hasoru malu halo enkontru ba dala tolu, iha fulan Abril tinan 2026.
“Foin lalais halo ona enkontru no sei hasoru malu dala ida tan iha fulan abril tinan oin, tanba nee ita agradese tanba hasoru malu iha Kogja lao ho diak no assuntu importante balun hahu haree ona” dehan nia.
Iha hasoru malu nee Okto dehan, diskute kona-ba fronteira nee lao dame no hakmatek iha ambiente pas entre nasaun rua Timor Leste ho Indonezia durante iha Jogja.
Foin lalais lider husi nasaun rua hahu halo debate ba segundu ronde durante diskusaun loron tolu, delegasaun rua nee servisu ho konstrutivu no halo progresu ba rezultadu ida neebe ekuitativu.
Delegasaun nasaun rua nee reafirma sira-nia kompromisu atu alkansa akordu ida neebe konsistente ho lei internasional, inklui Konvensaun Nasoins Unidas kona-ba Direitu Tasi nian (UNCLOS).
Timor Leste ho Indonezia konkorda atu halao terseira ronda negosiasaun formal iha tinan 2026, neebe Timor-Leste mak sei sai uma nain.
Antes nee, Timor Leste konklui ona fronteira marítima permanente ho Australia liu husi konsiliasaun neebe susesu tuir UNCLOS, neebe rezulta iha tratadu neebe asina iha tinan 2018 no ratifika iha 2019.
Timor Leste ho Indonezia konklui ona ronda daruak negosiasaun formal fronteira marítima iha Yogyakarta, Indonezia, neebe halao husi loron 8 too 10 fulan-dezembru 2025. Ronda daruak nee tuir negosiasaun formal dahuluk iha Díli iha loron 19 too 20 fulan-agostu 2025, iha neebe nasaun rua troka pozisaun abertura no konkorda kona-ba prinsípiu orientador ba negosiasaun sira.
Jornalista: Emerenciana Pinto
Editora: Carme Ximenes
