DILI, STLTIMORLESTE.com – Ensinu Baziku Sentral (EBC – sigla português) 10 Dezembru Komoro apresia no agradese ba okupantes neebe mak hela tinan barak nian laran iha areador eskola refere.
Lia agradese nee hatoo husi Diretor EBC 10 Dezembru Komoro, Calistro A. Guterres ba jornalista STL iha nia knaar fatin Komoro, Segunda nee (14)07/2025).
“Ami nian eskola apresia no agradese ba komunidade sira neebe mak durante tinan naruk nia laran hela iha areador eskola ida nee, no agora sira hamamuk ona espasu eskola ida nee atu nunee eskola presiza halo jestaun neebe mak diak, bainhira komunidade sira sai ona pelumenus halo buat ruma ba eskola, tanba eskola nee presiza nesesidade barak liu biblioteka no fatin ba merenda eskolar,” nia komenta.
Nia afirma, komunidade hamamuk ona fatin ida nee oinsa mak halo dapur ba merenda no sala enkontru, tanba nee eskola ninia planu karik ba futuru Ministeriu Edukasaun bele intende lalais ba asuntu ida nee ou halo dezenvolvimentu iha eskola ida nee, atu nunee bele responde nesesidade estudantes sira nian.
“Xefe familia hamutuk 22, ohin nee Xefe familia ida mak foin tula sasan, tanba ninia oan sei nurak, tanba nee ohin nia mak ikus ona sai iha areador eskola ida nee, tanba sira seluk nee sai dezde iha loron hirak liu ba,” katak nia.
(jac)
