DILI, STLTIMORLESTE.com – Okupante husi Eskola Baziku Sentral (EBC – sigla português) 10 Dezembru Komoro hamutuk uma kain 13 prontu koopera no sira hein karta notifikasaun.
Kestaun nee hatoo husi Diretor EBC 10 Dezembru Komoro, Calistro A. Guterres ba jornalista STL, Segunda nee (07/04/2025) .
“Okupante foin daudaun iha 21 Marsu autoridade Munisipiu Dili ho ekipa boot ida inklui nível edukasaun nasional, munisipal sira mai hotu ona enkontru ho Xefe Suku no Xefe Aldeia sira ho komunidade sira aseita ho saida mak autoridade fo ba sira katak, primeiru sei halo identifikasaun ba komunidade sira neebe hela iha eskola laran, identifikasaun halo hotu tiha ona, dadus hatama hotu tiha ona, hein para komunidade sira hetan notifikasaun, bainhira notifikasaun nee mak foin halo asaun katak, data determina bainhira mak atu husik hela eskola ida nee, komunidade sira nee lori fali ba iha neebe,” dehan nia.
Nia dehan, komunidade sira nee prontu koopera, tanba iha nee maioria profesor deit, foin daudaun Diretor Eskola husi ME, Deolindo mos mai iha nee ho Prezidente Autoridade Munisipiu esplika ba profesor sira prontu koopera, maibe sai ho dignu no hein bainhira mak fo notifikasaun, sira prontu bele husik eskola.
“Iha nee hamutuk familia lo-loos nee nain 13, profesores hamutuk uma kain 6, maioria nee estudantes no komunidade husi familia profesores ninia, neebe sira mak okupa areador eskola,” nia informa.
Iha parte seluk, Sekretariu Estadu Ensinu Sekundariu Jeral no Ensinu Tekniku Vokasional, Domingos Lopes Lemos hatete, relasiona ho komunidade hirak neebe mak sei okupa areador eskola iha kapital Dili, Ministeriu Edukasaun (ME) koordena nafatin ho Diretor Servisu Edukasaun Munisipiu Dili.
“Ida nee hau hanoin ita koordena ho Diretor Edukasaun Munisipal, tanba sira mak sei hamutuk ho autoridade munisipal sira hotu, ita fo ona hanoin ruma ba sira para sira bele koordena ho autoridade munisipais ninia,” dehan nia.
Nunee mos Sergio A. da Cruz hanesan Diretor Eskola Sekundariu Jeral nu. 4 Setembru Balide hatete, iha eskola ida nee, komunidade neebe mak too agora sei hela nee bele dehan, kategoria uma kain lima ou neen no komunidade sira nee hela kleur ona iha areador eskola ida nee, maibe tuir lo-loos areador eskola nee komunidade sira labele hela, ho nunee manorin sira halao aprendizajen ba estudantes sira ho diak.
“Hau hanoin kona-ba okupantes sira nee hori bainhira nee SEATOU mai dala rua, hau rasik mos hatoo tiha ba, ME mos mai, maibe xefe suku mos sei simu fali karta ida husi ME, atu nunee nia bele hatene komunidade sira nee bele foin sai, maibe areador eskola nee ita prontu koopera para bele hamamuk fatin areador eskola ninia. Konaba komunidade hela iha areador eskola nee prejudika aprenduzajen ga lae, loos duni tanba nee prejudika, dala ruma aprendizajen lao hela, ita nian maluk sira nee uza transporte tama no sai iha areador eskola ninia,” nia informa.
(jac)
