DILI, STLTIMORLESTE.com – Okupantes iha areador Ensinu Baziku Sentral (EBC – sigla português) Bidau Akadiru-hun simu ona karta notifikasaun no hein deit atu hamamuk ona fatin.
Haktuir Superintendente Edukasaun Munisipiu Dili, Cesarina Correia Guterres ba jornalista STL iha nia knaar fatin Bidau, Kuarta nee (23/07/2025).
“Kona-ba okupantes sira iha Eskola 10 Dezembru sai ona no iha oportunidade insfraestrutura bele halo tan edifisiu foun ba eskola refere, aumenta sala de aula. Tanba Eskola 10 Dezembru iha nivel eskolaridade 2 mak hamutuk ESJ no EB. Okupantes agora daudaun mos Edukasaun Munisipiu ho Autoridade Munisipal sei enkontru ho familia 11 iha Eskola EBC Sergio Viera de Mello Bekora atu nunee bele fo notifikasaun ba sira,” nia esplika.
Nia dehan, EBC Bidau Akaderuhun okupantes sira simu ona notifikasaun iha dia 15 Julhu liu ba hein atu sai deit ona para bele hamamuk fatin refere. Bidau Akadiruhun uma kain 8, ESJ 4 Setembru seidauk.
Iha fatin seluk, Calistro A. Guterres nuudar Diretor EBC 10 Dezembru Komoro dehan, komunidade hamamuk ona fatin ida nee, oinsa mak halo dapur ba merenda no sala enkontru, tanba nee eskola ninia planu karik ba futuru ME bele intende lalais ba asuntu ida nee ou halo dezenvolvimentu iha eskola ida nee, nunee bele responde nesesidade estudantes sira nian.
“Ba ami nian eskola apersia no agradese ba komunidade sira neebe mak durante tinan naruk nia laran hela iha areador eskola ida nee no agora sira husik hamamuk ona espasu eskola ida nee atu nunee eskola presiza halo jestaun neebe mak diak, bainhira komunidade sira sai ona pelumenus halo buat ruma ba eskola, tanba eskola nee presiza nesesidade barak liu biblioteka no fatin ba merenda eskolar,” nia komenta.
Nunee mos Diretor ESJ 4 Setembru Balide, Sergio A. da Cruz hatete, too agora komunidade sira seidauk hetan karta notifikasaun, maibe uluk husi SEATOU mak halo ona vizita mai iha eskola ida nee.
“Ita nian okupantes iha eskola ida nee seidauk simu karta notifikasaun, maibe husi parte SEATOU mak mai ona,” nia haktuir.
(jac)
