DILI, STLTIMORLESTE.com – Organizasaun Mundial Saude (OMS) hamutuk Ministeriu Saude (MS) halo revizaun konjunta nasional no internasional ba sistema vizilansia kona-ba Programa Esensial Imunizasaun (EPI), no vasina sira ba prevene moras Vaccines Prevent Diseases (VPD) iha Timor Leste (TL).
“Hau sente kontente ita hahu revizaun konjunta nasional no internasional krusial ida nee ba ita nia Programa EPI no vasina sira ba prevene moras VPD iha TL,” hatete reprezentante OMS iha TL, Arvind Mathur liu husi nia diskursu iha Hotel Novu Turizmu, Segunda (14/10/2024).
Nia dehan, iha enkontru ida nee husi grupu partisipante oin-oin husi organizasaun nasional no internasional sira reflete importansia husi revizaun ida nee no vizaun kompartilhada neebe tenke kaer ba TL neebe saudavel liu.
Nia esplika, imunizasaun mak intervensaun saude publika neebe kustu-efetivu liu neebe disponivel, oferese valor esepsional ba investimentu, entaun ida nee mak ferramenta ida neebe makaas liu hodi prevene moras infesiozu sira no salva joven barak nia moris.
Durante dekada balun TL halo ona progresu signifikativu iha programa EPI nia okos, atinji marku boot balun. Nasaun nee mantein nia estatutu livre husi poliu dezde 1995, halakon ona tetanu inan no neonatal iha 2012. TL konsege halakon sarampu iha 2018, no rubella iha 2023.
Nia deklara, OMS sente orgulhu tebes atu fahe katak TL lansa ona vasina HPV ba labarik feto tinan 11-14 iha tinan ida nee, no iha deit semana tolu nia laran, notavel 91% husi labarik feto sira neebe alvu simu ona vasina nee. Maibé, dezafiu barak mak sei iha neebe tenke rezolve atu asegura katak labarik hotu-hotu iha asesu ba vasina sira neebe salva.
“Barreira sira ba imunizasaun persiste tanba terrenu neebe difisil, fasilidade transporte neebe limitadu, kestaun sira iha kadeia fornesimentu, falta pesoal kuidadu saude neebe treinadu, informasaun sala kona-ba vasina sira, no finansiamentu neebe la adekuadu. Atu ultrapasa sira no hametin programa EPI iha Timor Leste, ita tenke servisu hamutuk,” nia koalia.
Nia relata, revizaun vijilansia konjunta nasional no internasional EPI no VPD ida nee, neebe halao husi loron 14 too loron 25 Outubru, mak pasu xave ida iha prosesu ida nee.
Nia deklara, peritu sira husi mundu tomak no organizasaun sira hanesan CDC Atlanta, Universidade Sydney, Sede OMS, WHO SEARO, OMS Bangladesh, UNICEF EAPRO, no MS Indonezia nian, hamutuk ho ofisial nasional sira sei halao revizaun ho objetivu prinsipal sira husi revizaun ida nee mak iha pontu importante tolu hanesan dahuluk, atu fornese ba diretor sira programa saude publika nian no ema sira neebe halo polítika ho vizaun jeral ida neebe klaru no komprensivu kona-ba estatutu EPI nian no vijilansia moras neebe bele prevene ho vasina.
Nia hatutan, daruak atu avalia progresu neebe halo ona hodi atinji meta no alvu kontrolu VPD xave nasional, rejional no global, datoluk atu kria plataforma ida hodi troka lisaun sira neebe iha valor neebe aprende ona ho nasaun sira seluk neebe hakaas aan ba objetivu komun.
Iha fatin hanesan, Xefe Departamentu Imunizasaun iha MS, Onna Pereira deklara, atividade ohin loron nian mak halo revizaun konjunta nasional no internasional ba sistema visilansia kona-ba EPI, no vasina sira ba prevene moras VPD iha TL.
(jen)
