BAUKAU, STLTIMORLESTE.com – Organizasaun Naun Governamental hamutuk 6, lansa kampanha Advokasia Bazeia ba Evidensia (ABE) iha Suku Triloka, Postu Administrativu Baukau Vila, Munisipiu Baukau.
Informasaun nee hatoo husi Reprezentante ONG 6, Xefe Peskizadora Asosiasaun Unidade Feto ba Dezenvolvimentu (AUFD), Domingas Tilman ba jornalista sira iha Sede Suku Triloka, Segunda nee (21/10/2024).
“Ohin ami konsentra iha Triloka ho programa advokasia bazeia ba evidensia, tanba iha ita nia rai rasik kona-ba violensia sei aumenta liu-liu feto no labarik, husi problema sira nee ita atu halo prevensaun,” nia dehan.
Xefe Peskizadora nee sublina, kampanha refere nuudar meius atu fo konhesimentu ba komunidade feto no labarik sira, atu hatoo keixa bainhira hetan violasaun husi familia rasik no ema seluk atu minimiza kazu violensia hasoru feto no labarik feto.
Partisipante Jeovania Freitas da Costa orgulhu ho atividade refere, tanba bele hakbesik aan ba feto iha baze, hodi halo keixa bainhira hasoru violensia.
“Durante hau haree maluk barak hasoru violensia maibe la halo keixa, tanba tauk, la hatene oinsa atu halo keixa, maibe espera kampanha nee bele ajuda hau nia maluk sira halo keixa, bainhira hasoru violensia ruma,” tenik Jeovania.
Enkuantu Xefe Suku Triloka, Reinaldo Nicolao da Silva apresia ba ONG sira neebe eziste iha TL, tanba nuudar parseiru Governu atu rezolve mos problema balun neebe durante nee komunidade enfrenta, liu-liu violensia bazeia ba jeneru, maibe durante sensibilizasaun no advokasia sira seidauk konvese, tanba violensia kontinua akontese.
Entretantu programa kampanha ABE neebe realiza iha Suku Triloka nee, responsabiliza husi Asosiasaun Unidade Feto ba Dezenvolvimentu, CFDH, KDP, CJMB, ADFTL inklui Uma Esperansa.
(EST 2)
