DILI, STLTIMORLESTE.com – Embaixador Japaun iha Timor Leste (TL) asina akordu ho Organizasaun Naun Governamental Frontline iha TL, hodi hasae kualidade servisu saude iha Munisipiu Bobonaro, liu-liu atu kombate taxa mortalidade inan ho bebe.
Lia hirak nee hatoo husi Embaixador Japaun, Tetsuya kimura ba jornalista sira iha Farol, Dili, Segunda nee (17/03/2025).
Embaixador hateten, nia sente haksolok tebes, tanba bele asina akordu projetu foun hodi hasae kualidade servisu saude materna liu husi kapasitasaun medika no hadia fasilidade sira iha Munisipiu Bobonaro.
“Hau haksolok tebes atu sai uma nain ba serimonia asinatura ba projetu foun, “Hasae Kualidade Servisu Saude Materna Liu Husi Kapasitasaun Medika no Hadia Fasilidade Sira Iha Munisipiu Bobonaro ba Faze Dahuluk”, neebe sei implementa husi Frontline no finansia husi Governu Japaun,” hatete Embaixador Japaun.
Nia dehan, nasaun Japaun parseria besik ho Governu TL, ONG Japoneza inklui Frontline ONG Timoroan no organizasaun internasional sira, too agora implementa ona projetu barak relasiona ho servisu saude hamutuk 60 resin iha TL.
“Hau haksolok atu salienta katak, ami nia projetu saude dahuluk liu iha TL foka liu ba saude materna infantil nian, neebe hahu iha tinan 2002, fiar katak hamenus mortalidade inan nian sei iha impaktu direita ba sobrevivensia no kresimentu labarik sira, futuru nasaun ida nee nia, agora daudaun ami moderniza hela Sentru Saude Komunitaria 20 iha Munisipiu 12 liu husi parseria ho UNFPA,” nia argumenta.
Nunee mos daudaun nee iha ona prosesu atu konstrui sala obstetrisia no ginekolojia nian ho sala partu nian iha Hospital Nasionál Guido Valadares (HNGV) neebe sei remata iha tinan 2027.
Tanba nee Embaixada Japaun no Frontline apoia ona hasae kualidade servisu saude materna nian dezde tinan 2014, foku husi projetu tinan ida nee mak atu harii sala ba inan no labarik sira iha Munisipiu Bobonaro iha deit sala rua ba inan no labarik sira, maske iha sentru saude 7.
Iha fatin hanesan, Diretor Organizasaun Naun Governamental Frontline iha Timor Leste, Yohei Kawaguchi hateten, Frontline konsidera akordu nee importante tebes atu kombate taxa mortalidade materna nian no neonatal.
“Frontline konsidera katak ida nee bele sai hanesan razaun ida ba taxa mortalidade materna no neonatal neebe aas liu iha Bobonaro kompara ho media nasional, projetu refere ho objetivu atu hamenus taxa mortalidade sira nee iha futuru, Frontline mos sei tau esforsu ba kapasitasaun laos deit ba mediku, parteira no inan sira, maibé mós ba pesoal saude sira seluk iha Munisipiu Bobonaro no membru familia sira iha komunidade nia leet, ami hein katak servisu ho grupu oin-oin, iha tempu hanesan bele lori efeitu pozitivu sira neebe boot liu tan,” nia hatete.
Nia afirma, Frontline iha projetu anterior neebe halo ona konkista notavel sira liu husi oferese formasaun ekografia neebe mak nafatin falta iha nasaun ida nee, foin lalais nee hau tuir serimonia ida iha neebe estudante nain 15 hetan sertifikasaun ba kompletasaun formasaun refere.
Nia salienta, Frontline sei kontinua fo formasaun ba pesoál mediku barak liu tan atu nunee bele hadia servisu saude inan nian ho projetu foun nee.
Nunee nia parte mos agradese ba Embaixada Japaun iha TL no Governu TL neebe mak fo oportunidade ba sira atu halao sira nia servisu liu-liu iha Munisipiu Bobonaro.
“Aproveita oportunidade ida nee, hatoo ami nia gratidaun ba Ministériu Saude, Vise Ministru Saude no Munisipiu Bobonaro partikularmente apoiu nafatin ba projetu nee, hau hakarak konklui hau nia komentariu hodi dezeja susesu ba projetu nee, prosperiedade TL nian no ksolok saúde di’ak ba partisipante hotu-hotu,” nia konklui.
Enkuantu orsamentu neebe utiliza hodi implementa projetu refere ho total hamutuk US$ 490,751 no kontratu subsidiu nee asina iha Embaixada Japaun iha Timor Leste husi Embaixadór Tetsuya Kimura ho Yohei kawaguchi, reprezentante nasaun husi ONG Frontline.
(EST 3)
