DILI, STLTIMORLESTE.com – Primeiru Ministru (PM), Kay Rala Xanana Gusmão hatete, Organizasaun Nasoins Unidas (ONU) sei fo hanoin ba Governu atu kria kondisaun ba redusaun ka hakotu problema violasaun direitus hasoru labarik sira iha Timor Leste (TL).
“Depois de enkontru nee remata, nia bele fo hanoin ruma mai Governu TL bele haree daudaun hodi bele kria kondisoes para atu reduz ou hakotu tiha problema sira nee kontrariu ba prinsipius fundamentais hodi afeta ba labarik sira nia direitus,” hatete Primeiru Ministru, Xanana ba jornalista sira, hafoin hasoru malu ho reprezentante espesial Sekretriu Jeral ONU, Najat Maalla M’Jid ho nia ekipa iha Palasiu Governu, Tersa nee (04/03/2025).
Xefe Governu dehan, nia mai nuudar reprezentante Sekretariu Jeral ONU nian hodi koalia ho ita nia maluk sira iha nee, ho sosiedade sivil kona-ba violasaun ba direitu labarik sira nian, nee mak ohin ami hasoru malu, los duni katak iha nee akontese duni violasaun ba direitus nee mak hau husu atu defini didiak kona-ba direitus nee saida, buka hodi reduz violasaun ida nee, tanba dala barak ita rona hela deit violasaun seksual, maibe iha direitu sira seluk mos iha labarik sira nia, Governu mos tenke tau atensaun ba ida nee
Entretantu reprezentante Espesial Sekretariu Jeral ONU bá Violénsia Kontra Labarik, Najat Maalla M’jit hatete, Governu Timor Leste iha kompromisu bo’ot tebes hodi hakotu forma hotu-hotu hasoru labarik sira.
“Hau hakarak fó hanoin katak definisaun labarik ne’e liga bá konvensaun direitu labarik nian ne’ebé ratifika ona iha TL ho nia labarik sira idade 18 mai kraik. Violénsia hasoru labarik sira iha forma oin-oin, akontese iha ambiente oin-oin. Ida ne’e akontese iha sírkulu konfiansa nian iha eskola sira, iha uma no husi online,” nia hatete.
(EST 2)
