DILI, STLTIMORLESTE.com – Konselhu Ministru (KM) aprova operasional konjunta ba FALINTIL Forsa Defeza Timor Leste (F-FDTL), hodi asegura selebrasaun loron Proklamasaun Independensia 28 Novembru ba dala 49, inklui bá Natal ho tinan foun.
Liu husi reuniaun Konselhu Ministru (KM) iha Palasiu Governu, Kinta nee (21/11/2024) aprova Projetu Rezolusaun Governu neebé aprezenta husi Ministru Defeza no Interiór, Donaciano do Rosário Gomes no Francisco da Costa Guterres, ida idak, kona-ba kompromisu Operasionál Konjuntu entre FALINTIL-Forsa Defeza Timor-Leste no Polísia Nasionál Timor Leste, hodi garante seguransa, estabilidade sosiál no moris diak populasaun nian, durante Serimónia Ofisiál sira ba Komemorasaun Aniversáriu Proklamasaun Independénsia Timor Leste nian ba dala 49, nune’e mós durante festividade Natál no Tinan foun nian.
Rezolusaun Governu nee estabelese operasaun patrulhamentu no vijilánsia iha fatin sensivel sira iha munisípiu hotu-hotu, prevene aktu instabilidade sosiál. Forsa Tarefa nee sei koordena husi Xefe Estadu Maior Jenerál Forsa Armada no Komandante Jerál PNTL, ho apoiu husi entidade governamentál no institusionál oin-oin.
Rezolusaun nee prevee mós medida espesífiku sira, hanesan definisaun husi kadeias komandu, regras empeñu no apoia intelijénsia nian, no mós uzu proporsionál hosi forsa tuir lejizlasaun atuál.
Períodu operasaun Task Force ida nee sei hahú iha loron 20 fulan Novembru tinan 2024 too loron 5 fulan Janeiru tinan 2025.
(gui)
