DILI, STLTIMORLESTE.com – Relasiona ho ordem Advogadu Privadu nian neebe seidauk hetan aprovasaun, Ministru Justisa deklara katak, oras nee daudaun iha ona faze negosiasaun.
Tuir Ministru Justisa, Sergio Hornai katak, ordem dos Advogadus antes nee kaduka tiha, maibe sira prepara ona atu lori fila fali ba iha Konselhu Ministru.
“Nia prosesu lao hela, momentu neeba kaduka tiha, iha V lejislatura ita submete daudaun ona no iha hela faze negosiasaun atu bele halo submisaun ba iha Konselhu Ministru atu Konselhu Ministru haruka ba iha Parlamentu Nasional,” dehan Ministru Justisa ba jornalista sira iha Kaikoli, Segunda (26/05/2025).
Nia hatutan, inklui mos ba iha estatutu guarda prizionais sira nian sei haree atu lori ba iha Konselhu Ministru hodi diskute.
Iha fatin ketak, Jurista Jose Maria Guterres dehan, importante duni iha Ordem dos Advogadus atu regula Advogadu sira nia servisu.
“Hau hanoin importante duni iha Ordem Advogadus nian atu regula Advogadu sira nia servisu, tanba knaar nee mos imporrante atu defende ema neebe buka justisa,” dehan nia.
Hatutan tan, ohin loron ita iha ona Juiz, Prokurador, Defensor Publiku no Advogadu mos hola parte hanesan autor judisial, tanba nee iha duni ordem ida hodi regula sira.
Afirma tan, ohin loron iha mos Advogadu balu mai husi rai liur, tanba nee tenke kria ordem Advogadu nian hodi regula, liu-liu bainhira atu harii eskritoriu sira.
(ter)
