DILI, STLTIMORLESTE.com РOrdem Advogadu Privadu neebe aprezenta husi Minist̩riu Justisa (MJ) ba iha Konselhu Ministru hetan aprovasaun no oras nee iha ona Parlamentu Nasional (PN) hein marka ajenda halo diskusaun.
“Ordem dos Advogados tama ona iha Konselhu Ministru hetan ona aprovasaun, lori ona ba iha Parlamentu Nasional (PN) hein ajenda deit ona husi PN,” dehan Koordenador Grupu Trabalhu Advogadu Privadu, Sergio Lobo Junior ba STL iha Kaikoli Kinta (05/03/2026).
Nia esplika, iha PN Komisaun A sira sei halo re-konfirmasaun fali ba iha lei husi ordem nee atu bele kontinua diskute, maibe se sira haree fali tenke sosializa no halo fali diskusaun.
“Orden Advogadu nee laos foin haruka ba dala uluk, maibe uluk mos haruka ona dala rua ba maibe kaduka hotu, se ida haruka ba nee mak kaduka tan bele dehan dala tolu ona, tanba nee espera sira bele haree hodi aselera ordem nee,” dehan nia.
Nia argumenta, estatutu nee preve katak, se mak atu sai Advogadu Privadu hodi kaer prosesu tenke mai husi Sentru Formasaun, kuandu estatutu nee hamriik ona ordem Advogadu Privadu mak sei prepara rasik, kria nia prosedimentu atu servisu hamutuk ho Ministeriu Justisa hodi prepara ema sira advogadu husi ordem mak sei regula.
Aktual Advogadu dehan, ordem Advogadu Privadu nee fo dalan Advogadu Internasional sira maibe iha limitasaun hotu, sira mai tenke rejistu halo tuir prosedimentu kona-ba lei neebe iha.
Iha fatin ketak, Akademiku UNTL, Rafael De Jesus dehan, presiza duni iha lei ordem advogadu atu regula sira nia servisu.
“Hanoin presiza iha duni ordem ida atu regula advogadu sira nia servisu, hodi nunee sira bele atende diak liu tan kliente sira neebe iha,” dehan nia.
Nia sublina, presiza duni iha lei ordem advogadu, atu nunee regula kona-ba kustu neebe kliente sira selu, tanba ohin loron kliente balu mos seidauk hatene didiak kustu neebe fo ba iha advogadu sira.
Fiar katak PN sei haree tetu hodi konsidera kestaun nee importante, atu bele tau mos ba iha ajenda hodi halo diskusaun.
(ter)
