DILI, STLTIMORLESTE.com – Primeiru Ministru (PM), Kay Rala Xanana Gusmão hatete, povu tomak orgulhu hodi festeza Timor Leste (TL) nia adezaun ba ASEAN.
Primeiru Ministru Kay Rala Xanana Gusmão liu husi nia diskursu iha Palasiu Prezidensial Nicolau Lobato, Bairo Pite, Kuarta kalan (29/10/2025) hatete, nia too iha Aeroportu no husi Aeroportu mai palasiu dook liu fali husi Dili ba Kuala Lumpur, no povu sira kontente tanba komprende Timor Leste nia adezaun ba ASEAN neebe prepara iha tinan naruk nia laran.
“Hotu-hotu simu hau iha luron haree sira kontente, kontente tanba sira komprende, tanba ita lao kleur mak sai membru ASEAN, los duni iha tinan 2011 iha Bali Demokrasia Forum hau hasoru Susilo Bambang Yudhoyono amigu boot Timor Leste nia, Prezidente Republika Indonezia, hau hatoo ba nia kona-ba ita nia hanoin tama ASEAN hanesan husu karik konselhu ruma, nia dehan nunee, hau fo apoiu tomak no hamriik dehan katak Indonezia apoiu tomak ita nia hakarak atu sai membru ASEAN,” dehan PM Xanana.
Primeiru Ministru hatete, preparasaun Timor Leste nia adezaun ba ASEAN nee kleur duni? Bele husu ba malu tanba sa kleur nunee, hotu-hotu sei lembra iha 1999 bainhira Timor Leste manan tiha referendum ho UNTAET, no prepara aan iha 2002 nuudar ona rai ida ukun aan, problema barak tebes iha prosesu atu harii estadu nomos iha prosesu atu harii nasaun tanba Timor osan laiha.
“Ho sira nee hotu mak too iha 2011 fo hatene deit katak ita hakarak sai membru ASEAN laos dehan aban nee sai kedas, husi 2011 ita infrenta problema interna mos barak, ita mos buka harii no konsolida instituisaun estadu nia tanba ita foin mak ukun aan no area seluk tan,” dehan PM Xanana.
Iha biban nee, Prezidente Republika Jose Ramos Horta hatoo agradese ba juventude, estudante no povu hotu-hotu neebe mai hamutuk hodi simu Primeiru Ministru Kay Rala Xanana Gusmão hodi festeza Timor Leste nia adezaun ba ASEAN.
“Agradese ba hotu-hotu neebe mai iha nee, ohin simu maun boot Primeiru Ministru, husi kosok oan sira, inan aman sira, pai sira mai iha nee, no obrigadu ba komisaun organizadora neebe organiza eventu diak tebes,” dehan Prezidente Republika.
Iha biban nee Prezidente Republika hatoo agradese ba parte hotu liu-liu korpu diplomatiku no parte hotu nia prezensa nomos agradese embaixador sira rai sira neebe parseiru Timor Leste nia rasik no parseiru ASEAN, tanba ho sira nia kontribuisaun diak laos deit tulun Timor momentu tama ASEAN, tanba hahu kedas 2002 sira ajuda no kontribui hodi harii estadu halo buat buat ruma iha setor oin-oin.
Jornalista: Emerenciana Pinto
Editor: Xisto Mendonça
