DILI, STLTIMORLESTE.com – Primeiru Ministru (PM), Kay Rala Xanana Gusmão orgulhu ho vitória husi boxista Délio A. Mouzinho ho Daniel D. A. Belo, nunee promete sei kontinua fo apoiu hodi dezenvolve talentu Timoroan nan rua nee iha futuru.
Sentimentu orgulhu no promesa nee Primeiru Ministru hato’o bainhira simu boxista Délio A. Mouzinho ho Daniel D. A. Belo iha Palásiu Governu, Kinta nee (13/02/2025) hafoin fila husi Bali, Indonezia.
Treinador El-Matador, Abilio Orlando hateten, boxista nain rua nee molok ba tuir kompetisaun iha Bali, Indonézia, mai hasoru malu ho Primeiru Ministru Xanana Gusmão no ohin fila hikas mai, hakat too iha Palásiu hodi agradese bá apoiu moral no finanseiru neebe Xefe Governu oferese ona.
“Ami hakarak mai hatudu direita ba Avo Nana kona-ba rezultadu neebe boxista nain rua hetan. Primeiru Ministru kontente ho rezultadu no promete apoia tanba lori Timor bá mundu. Avo Nana husu tenke disiplina, treinu didiak no kontinua dezenvolve talentu ne’e,” Abilio Orlando hateten.
Boxista Délio Mouzinho agradese ba Maromak, eroi no Timoroan sira neebe apoia tantu material no moral.
“Vitoria neebe hau hetan, esforsu nee laos mai husi hau mesak, maibe hau hateke ba sorin-sorin iha apoiu barak. Ida nee aumenta hau nia espíritu, patriotizmu no nasionalizmu forte tebes atu luta,” nia espresa.
Tanba nee husu nafatin Timoroan sira atu fo apoiu ba nia, tanba iha loron 24 fulan Marsu 2025 sei ba partisipa kompetisaun iha Cánada no Julhu iha Jakarta, Indonezia.
Antes nee Primeiru Ministru, Kay Rala Xanana Gusmão oferese osan privadu ba boxista nain rua hamutuk US$ 3.400 hodi ba partisipa iha kompetisaun Boxe neebe realiza iha Bali, Indonezia.
Iha kompetisaun nee, Délio Mouzinho halakon boxista husi nasaun Uzbekistaun ho naran Alisher Ismailov no Boxista Daniel Asis Belo halakon boxista husi Indonézia ho naran Sakti Manulag.
Bainhira boxista nain rua too iha Aeroportu Internasional Prezidente Nicolau Lobato, Kompro, família no Timoran barak ho kontente ba hasoru no halo konvoi haleu Dili laran.
(alb)
