DILI, STLTIMORLESTE.com – Liu husi inspesaun neebe halao iha eskola sira iha kapital Dili, identifika iha eskola balun sei falta manorin, tanba nee orienta ona eskola sira bele halo karta pedidu ba Ministériu Edukasaun.
Haktuir Superintendente Edukasaun Munisípiu Dili, Cesarina C. Guterres ba STL iha nia knaar fatin, Segunda nee (27/07/2026).
“Asuntu konaba ita nian manorin sufisiente iha Dili, liu husi ami nian inspesaun nia servisu halo identifikasaun ba ita nian manorin iha eskola balun kapital Dili, neebe mak sei falta no ami orientasaun ba eskola haruka karta pedidu ba Edukasaun Munisipiu para husu apoiu profesor ba ita nian eskola sira,” dehan nia.
Tuir Cesarina, husu nafatin ba eskola hirak neebe identifika ona, sira tenke halo karta pedidu ida ba Ministeriu Edukasaun, ho nunee bele apoiu profesores ba eskola sira nee, atu nunee bele fasilita estudantes sira iha prosesu ensinu aprendizajen iha kada eskola ida-idak, tanba eskola balun iha Dili sei falta profesores, ba oin presiza aumenta.
Iha parte seluk, Manuel Verdial nuudar Diretor Eskola Sekundariu Jeral 10 de Dezembru Comoro katak, Eskola Sekundáriu Jeral 10 de Dezembro Comoro, too agora seidauk iha profesores ba disiplina lingua português.
“Hau seidauk halo karta legal, maibe ho hau nian aprosimasaun informal ba iha Diresaun Edukasaun Nasional Ensinu Sekundariu Jeral, liu-liu profesores neebe hanorin lingua português nee ami falta tebes, tanba profesores nain rua neebe tama reforma obrigatoriu, nee duni fatin ba profesores nain rua nee mak mamuk total,” nia afirma.
Nia dehan, se ida nee mak agora la hetan, sira sei buka meus oinsa bele haree labarik sira estajiadu haree ba sira nian kapasidade, sira bele ajuda disiplina ida nee hodi bele asegura daudaun aula nee, hodi hein bolsa kandidatu neebe ba lingua português, hodi haree ba disiplina ida nee daudaun nee sei mamuk hela.
“Ba disiplina ida nee fatin sei mamuk, oinsa mak ho rekrutamentu bolsa kandidatu ninia nee bele tau fali profesores nain rua ba disiplina português ninia, ita labele haree fatin nee ninia karga orariu nee labele mamuk, maibe durante nee ami fahe profesores sira balun hanorin too 30 oras, balun 34,” katak nia.
Entretantu Diretor Eskola Hotelaria no Turizmu Becora, Charles F. Guterres hatete, ba oin sira sei presiza tan profesores sanolu resin, tanba ita nian politika ministeriu nian agora daudaun nee atu halo rekrutamentu ba materia iha area produtivu ninia, atu koopera deit ba industria, depois mak foti husi industria mak mai hanorin, hanesan parte tempu deit, profesores matematika, biologia, inglês no português nee katak, nee liu husi rekrutamentu, maibe ba materia produtivu agora nee lori ema nee mai husi area industria nian.
(jac)
