DILI, STLTIMORLESTE.com – Orsamentu neebe mak preve ba Hospital Nasional Guido Valadares (HNGV) hamutuk US$ 14 milhoes, no sei tau prioridade ba sosa ekipamentus medikamentu nomos sei halo alargamentu ba edifisiu unidade sira.
“Orsamentu neebe aloka ba HNGV iha 2025 hamutuk US$ 24 milhoes resin, ita kompara ho tinan 2024 ita iha $13.5 milhoes, maibe grasa deus iha tinan 2025 ita sae ona ba iha US$ 14 milhoes resin,” hatete Diretora Administrasaun Finansa no Linguistika HNGV, Sara Maria Xavier ba jornalista sira iha HNGV, Kinta (17/10/2024).
Nia deklara, osan neebe preve ba HNGV nee fahe ba kategoria 4, hanesan Salariu Vensimentu, depois ba iha Bens Servisu, Kapital Menor nomos Kapital Dezenvolvimentu.
Nia deklara, iha 2025 HNGV sei tau prioridade ba sosa ekipamentus nomos halo alargamentu ba edifisiu.
“Orsamentu neebe preve ba 2025 ita haree liu ba kompras médikamentu klínikal sira inklui mos halo alargamentu ba edifisiu, pur ezemplu hanesan ita sei loke tan espasu balun iha unidade hanesan mini ICU,” nia koalia.
Nia informa, daudaun kama iha ICU hamutuk 6 deit mak labele responde hotu populasaun iha Timor Leste.
Entaun presiza kria fila fali kondisaun ba iha unidade hanesan medisina interna.
“Ita presiza atu kria fila fali kondisaun iha unidade sira nee hanesan medisina interna kuartu ida ita sei halo alargamentu, kria kondisaun hanesan mini ICU para tau ekipamentus hanesan ICU hodi fo tratamentu ba ita nia pasiente sira neebe mak tama ba komisaun kritis, se karik iha ICU nakonu,” nia tenik.
Nia hatutan, nunee sira loke tan medisina Geolojia neebe mak kria mos kondisaun para akumula pasiente sira neebe kategoria kritiku.
“Nunee mos sei loke tan iha medisina iha Geolojia mulher neebe mak sei kria kondisaun para akumula ita nia pasiente sira neebe tama ba kategoria ba kritiku tama ba kategoria ICU l,” nia hatutan.
Nunee mos sei sosa ekipamentus médiku sira ho nia objetivu atu redus transferensia pasiente ba rai liur.
(jen)
