DILI, STLTIMORLESTE.com – Proposta Orsamentu Jeral Estadu (OJE) ba Ministeriu Justisa (MJ) neebe ho montante US$ 12. 876.049 pasa iha espesialidade ho votu afavor 43, kontra 20 no abstensaun 1.
Liu husi debate proposta OJE 2025, entre Deputadu sira ho IX Governu Konstitusional iha Parlamentu Nasional (PN), Kinta (14/11/2024), Deputadu sira aprova ona orsamentu ba MJ.
Iha debate nee iha proposta alterasaun ida, maibe iha proposta nee la aprova.
Nunee Prezidente Parlamentu Nasional (PPN), Maria Fernanda Lay submete ba votasaun ba orsamentu tomak Ministeriu Justisa (MJ) nian.
“Rezultadu votasaun afavor 43, kontra 20 no abstensaun 1, nunee orsamentu ba MJ pasa”, anunsia PPN, Maria Fernanda Lay.
Entretantu tuir dadus neebe STL asesu, Proposta OJE 2025 neebe aloka ba Ministeriu Justisa ho montante milhaun US$ 12.876.049.
Husi orsamentu nee aloka ba Salariu Vensimentu US$ 8.082.102, Bens no Servisu US$ 4.328.716, Transferênsia Publika zero, Kapital Menor zero no Kapital Dezenvolvimentu US$ 265.231.
Osan nee mos ba programa Reforma Estadu US$ 191.497, programa Asesu ba Justisa US$ 9.546.425, programa Funsionamentu no Dezenvolvimentu Institusional US$ 3.128.161, ba programa Inkluzaun Sosial US$ 9.966.
(gui)
