DILI, STLTIMORLESTE.com – Reprezentante povu iha Uma Fukun Povu neebe lidera husi Prezidente Parlamentu Nasional, Fernanda Lay aprova ona Orsamentu Jeral Estadu (OJE) tinan 2026 ba Ministeriu Negosiu Estranjeiru no Kooperasaun (MNEK) ho montante US$ 36.334.526 pasa espesialidade ho votus afavor 42, kontra 0 no Abstensaun 23.
Membru Parlamentu nasional aprova, OJE ba MNEK ho montante US$ 36.334.526 fahe ba kategoria, salariu no vensimentu US$ 22.897.146, bens no servisu US$ 12.437.380, transferensia publiku 0, kapital menor milhaun US$ 1 no dezenvolvimentu 0.
Tuir intervensaun Ministru Negosiu Estranjeiru no Kooperasaun, Bendito Freitas iha debate espesialidade nee iha Uma Fukun Parlamentu Nasional Segunda nee (17/11/2025) dehan, orsamentu MNEK nee sei benefisia ba programa hanesan Politika externa Timor Leste (TL) nian funsionamentu, dezenvolvimentu instituisional ho nia sub-programa hanesan defende no promove interese TL nian iha estranjeiru, kooperasaun ba asuntu bilateral no multilateral, kooperasaun rejional iha ba Association of Southeast Asian Nation (ASEAN), fasilita ho koordenda instituisional ba ezekusaun polítika externa, Jestaun no kooperasaun ba Asuntus bilateral iha ASEAN no OCEANIA, Jestaun no koodenasaun ba Asuntus bilateral ba Amerika, Europa no Afrika inklui mos ho dezenvolvimentu instituisional no regulasaun ba kontrolu no kualidade.
Hafoin intervensaun husi membru Parlamentu Nasionál husi banka proponente sira nomos bankada opozisaun, Prezidente Parlamentu Nasional, Fernanda Lay ofisialmente tama ba votasaun, ho rezultadu vota afavor 42, Kontra 0 no abstensaun 23.
Jornalista: Joseph Koa
Editor: Joseph Koa
