BAUKAU, STLTIMORLESTE.com – Xefe Suku Uaitame, Celestino Morreira informa, orsamentu husi Programa Nasional Dezenvolvimentu Nasional (PNDS) tinan 2025 neebe aloka ba Suku Uaitame, Postu Administrativu Kelikai Antigu, Munisipiu Baukau, fila ona ba kofre estadu, tanba iha kestaun balu.
“Nia orsamentu fila ona ba kofre estadu tanba deit sira tau fali Postu Kelikai nia naran, orsamentu nee rihun US$ 30 resin karik,” hateten Celestino ba STL liu husi telefone, Segunda (10/11/2025).
Nia esplika, prioridade Suku Uaitame ba tinan 2025 husi Orsamentu PNDS atu implementa projetu reabilitasaun estrada husi area Gugulai ba Gamana ho distansia pur-volta kilometru 6, maibe projetu nee la implementa, tanba orsamentu ba planu projetu refere fila hikas ona ba kofre estadu.
Nia dehan, razaun orsamentu PNDS 2025 ba Suku Uaitame fila ba kofre estadu, tanba iha kestaun balu ba orsamentu refere neebe priense husi Xefe Aldeia Sialimu, Karnu inklui Xefe Aldeia Gamana tau fali Postu Administrativu Kelikai, maibe tuir loloos tau naran Postu Administrativu Kelikai Antigu, tanba tuir Jornal da Republika Suku Uaitame pertese ba Postu Kelikai Antigu.
Nunee projetu PNDS tinan 2025 nian iha Suku Uaitame la implementa ho razaun orsamentu fila ona ba kofre estadu, tanba sala iha naran Postu Administrativu.
“Horsiseik no horibainruak ita nia Diretor PNDS Sr.Amaro telefone mai hakarak ka lakohi orsamentu tenke ba fali kofre estadu, ami iha ona Postu Kelikai Antigu ita labele kontra lei nee orgaun tolu mak promulga,” Celestino katak.
Relasiona projetu PNDS tinan 2025 iha Suku Uaitame neebe la implementa, Xefe Suku nee sente triste, tanba kondisaun estrada husi Gugulai ba Gamana kondisaun aat no grave iha neebe tempu udan difikulta komunidade sira nian movimentu ho transporte, nunee tinan 2025 nee atu utiliza orsamentu husi PNDS reabilita estrada refere hodi fasilita komunidade sira nian movimentu ho transporte, maibe la realiza.
Tanba nee Celestino Morreira kompromete sei hasoru Diretor PNDS Munisipiu Baukau, bainhira kondisaun saude rekupera hikas husi moras neebe daudaun infrenta.
“Nee fo impaktu ba Suku halakon Povu nia direitu, neebe agora hau sei moras hela hau rekupera tiha lai mak hasoru fali ita nia Diretor PNDS,” Celestino komenta.
Liga asuntu nee jornalista STL tenta kombirma Diretor PNDS Munisipiu Baukau, maibe laiha fatin atu fo komentariu, tanba moras.
Jornalista: Tomas Reis
Editora: Carme Ximenes
