BAUKAU, STLTIMORLESTE.com – Orsamentu husi Programa Nasional Dezenvolvimentu Suku (PNDS) ba tinan 2025 nian, Suku Kaikua iha Postu Administrativu Vemasi hetan alokasaun US$ 34,270.00.
Xefe Suku Kaikua, Anibal Henrique da Costa esplika, prioridade Suku Kaikua ba orsamentu husi PNDS tinan nee, liu husi Konselhu Suku deside responde ba preokupasaun komunidade nian liu-liu estrada rural husi Kaikua ba Suku Vemasi Tasi neebe durante nee difikulta movimentasaun transporte, tanba kondisaun aat.
“2025 ami nafatin kontinuasaun prioridade cor beton, tanba dala nee too Vemasi Tasi dalan aat, nia kobre orsamentu US$ 34,270.00 ba osan infraetrutura nian la kabe ba osan operasional,” hateten Aniba ba STL liu husi telefone, Kuarta (10/07/2025).
Nia sublina, implementasaun PNDS tinan 2025 iha Suku Kaikua hahu ona iha loron 08 Julhu nee no tuir planu sei termina iha fulan Outubru tinan nee.
Maibe nia fundamenta, orsamentu PNDS tinan nee montante seidauk bele kobre preokupasaun komunidade Kaikua nian kona-ba estrada rural, tanba estrada distansia kilometru neen maibe alokasaun orsamentu tinan nee ba deit metru 350.
“Tuir estimasaun neebe tekniku PNDS sira fo ba ami iha deit 350 meter. Nuudar Autoridade rekomenda nafatin se bele tinan oin tau osan infraestrutura nian atu nunee bele rezolve too kilo ida ho balun,” Anibal akresenta.
Mezmu nunee maibe Autoridade Suku Kaikua nee agradese, tanba implementasaun programa PNDS nian iha nivel Suku bele responde preokupasaun komunidade sira nian ho fazeadamente, maibe nafatin husu Ministeriu Administrasaun Estatal atu aloka nafatin Orsamentu infraetrutura liu husi PNDS iha tinan oin ho montante neebe bele responde ba estrada rural Kilometru ida, tanba tinan nee ho alokasaun Orsamentu neebe iha tuir estimasaun husi tekniku PNDS nian katak, sei responde deit ba estrada metru 350.
Liga asuntu nee, STL seidauk hetan konfirmasaun husi parte dirijente PNDS Munisipiu Baukau, tanba la atende kontaktu telefone.
Entretantu Suku Kaikua iha Aldeia rua kompostu Aldeia Kaikua no Bahamori, rejistu total uma kain 329 ho total populasaun 1.969.
(tom)
