DILI, STLTIMORLESTE.com – Proposta Orsamentu Jeral Estadu (OJE) 2025 neebe aloka ba Gabinete Visi Primeiru Ministru (VPM I) ho montante rihun US$ 400 pasa ho votu afavor 42, kontra 17 no abstensaun 3.
Liu husi debate proposta OJE 2025, Kuarta nee (13/11/2024, iha Parlamentu Nasional, Deputadu sira aprova ona orsamentu ba Gabinete VPM I, Kalbuadi Lay.
Debate ba loron daruak iha faze espesialidade, maske iha proposta alterasaun 3, husi Deputadu sira ho numeru 43 atu hasai tiha US$ 190.742, ho razaun tinan 2024 ezekusaun zero, nunee atu aloka fali ba setor produtivu seluk. Enkuantu iha mos proposta 54 atu halo redusaun ba orsamentu reuniaun US$ 37.670, husi dotasaun orijinal US$ 66.970, ho nunee dotasaun final US$ 29.300, ho razaun osan neebe aloka iha 2024 ho montante US$ 29. 3000 hodi halo reuniaun dala 5, maibe rezultada seidauk haree.
Tanba nee, ba tinan 2025 halo redusaun tanba mina iha Kampu Bayu Undang la produs ona hanesan tinan uluk-uluk, no minarai mos menus ba beibeik. Enkuantu proposta altersaun numeru 61 atu halo redusaun US$ 388.822 husi dotasaun orijinal US$ 838.735, neebe prevee atu hodi rekruta tan funsionariu kontratadu 60. Enkuantu proposta 3 nee propoponente mai husi Bankada FRETILIN.
Hatan ba proposta alterasaun hirak nee, Visi Primeiru Ministru, Kalbuadi Lay hatete, rona husi intervensaun Deputadu sira nian ba proposta alterasaun, balu atu halo redusaun balu atu aumenta, prosesu orsamentu tinan-tinan primeiru prepara husi Ministeriu Finansas, depois ba iha KRO, ba fali Konselhu Ministru, ba audensia publiku, ba debate iha proposta jeneralidade mak mai espesialidade.
“Osan iha Gabinete Visi Primeiru Ministru lagasta rihun US$ 400, tanba asumi knaar 3 hanesan, tanba nee lei la.fo dalan atu simu Vensimentu iha ministeriu 3, tanba nee Vensimentu hau nian simu ona iha Ministériu Turizmu no Ambiente, tanba nee laiha fatin ba háu atu simu tan osan husi Visi PM nian”, esplika Kalbuadi.
Nia dehan, osan neebe aloka ba VPM I, Ministru Koordenador Asuntu Sosiais, Ministru Turizmu no Ambiente. Ezekusaun too horisehik 50%, nunee tama ba 2025 aloka nafatin osan ba Gabinete Visi PM.
Enkuantu kona-ba dehan ba osan atu halo reuniaun gasta rihun US$ 28, tinan ida nee preperasaun ba adezaun ba Organizasaun Mundial Komersiu, nunee agora preparasaun ba adezaun ASEAN no konvensaun lubuk ida nee mak harii hela osan sira nee.
Nunee mos kona-ba atu aumenta 60 pesoas atu aumenta iha Gabinete Visi PM, ida nee foti dadus husi neebé deskulpa, neebe husu atu cek di-diak, bele fo dadus. Nunee mos atu aumenta tan osan ba programa balu, lalikan ona.
Entretantu Prezidente Parlamentu Naional, Maria Fernanda Lay submete ba votasaun konana proposta altersaun 3, liu husi vootasaun direta, maibe la pasa.
Nunee PPN kontinua anunsia “Mai ita vota ba proposta orsamentu tomak ba VPM I, no vots afavor 42 kontra 17 no abstensaun 3, nunee orsamentu ba VPM I pasa iha espesialidade”, katak PPN, Maria Fernanda Lay.
Tuir dadus neebe STL asesu, Orsamentu 2025 ba Visi Primeiru Ministru aloka rihun US$ 400, iha Salariu Vensimentu US$ 147. 577, Bens no Servisu US$ 252.422, Transferênsia públika zero, Kapital Menor zero, Kapital Dezenvolvimentu zero.
(gui)
