DILI, STLTIMORLESTE.com – Proposta Orsamentu Jeral Estadu (OJE) 2025 ba Ministériu Petróleo no Rekursu Minerais (MPRM), US$ 47.239.935 aprova iha faze espesialidade ho votus afavor 42, kontra 4 no abstensaun 18.
Liu husi debate proposta OJE 2025, Segunda (18/11/2024), ba loron dalima, iha faze espesialidade iha PN, Deputadu sira aprova ona orsamentu ba MPRM. Iha diskusaun nee Deputadu sira husi opozisaun aprezenta proposta alterasaun 1 ho numeru 18.
Iha proposta alterasaun nee proponente husi Deputada Antoninho Bianco, Joaquim dos Santos, Maria Angelina Sarmento, neebe husu atu halo redusaun ba orsamentu MPRM nian, iha Programa Funsionamentu no Dezenvolvimentu Institusional, atu halo redusaun US$ 236.129, neebe mai husi dotasaun inicial US$ 6.669.030, nunee redus tiha montante neebe iha, total dotasaun final US$ 6.432.901.
Maibe proposta alterasaun nee, Ministru Petróleo no Rekursu Minerais (MPRM) Francisco Monteiro, rezeita proposta alterasaun née, hodi husu atu proponente retira.
Membru Governu nee hatete, mai ho razaun Bayu Undang atu hotu no Kadoras atu dada mai ka lae, husu para retira tiha, nunee mantein nafatin orsamentu.
“Hau husu se bele retira tiha nunee mantein orsamentu,” dehan nia.
Maibe proponnte kontinua avansa ba votasaun, enkuantu iha votasaun proposta alterasaun la pasa.
Nunee Prezidente Parlamentu Nasional (PPN), Maria Fernanda Lay submete ba votasaun orsamentu tomak ba MPRM. “Rezultadu votasaun afavor 42, kontra 4, no abstensaun 18, orsamentu ba MPRM pasa iha espesialidade”, anunsia PPN Lay.
Entretantu tuir dadus neebe STL asesu iha Proposta OJE 2025, orsamentu ba MPRM US$ 47.239.935, neebe fahe ba kategoria salariu vensimentu US$ 3.081.336, bens no servisu US$ 19.158.599 transferênsia publika US$ 25.000.000, kapital menor zero, kapital dezenvolvimentu zero.
(gui)
