DILI, STLTIMORLESTE.com – Parlamentu Nasional (PN) presiza tetu didiak antes sosa kareta ba Deputadu sira, tanba Primeiru Ministru rasik deklara katak, hela tinan 4 orsamentu husi Fundu Minarai hotu ona.
Kestaun nee hatoo husi Visi Diretor HAK, Antonino de Limas ba STL iha nia knaar fatin, Farol Kinta (28/08/2025).
Nia dehan, presiza haree ida neebe mak prioridade mak sosa, se kareta balu diak Deputadu sira uza lai, no ida neebe mak ladiak ona mak bele sosa nunee bele halo fiskalizasaun iha terenu.
Tanba kada tinan lima Parlamentu Nasional hakarak sosa kareta foun ba Deputadu sira bainhira osan laiha ona sei fo impaktu ba estadu no povu iha futuru.
“Kualker asuntu programa projetu nee sempre iha kustu entaun planu Parlamentu Nasional atu sosa kareta nee gasta kustu tanba sosa kareta foun no kareta diak, nee gasta osan boot, maibe ligadu ho preokupasaun husi Primeiru Ministru nian, katak osan hela oituan deit hela tinan 3 ka 4 hotu entaun mensajen mak nee ba Parlamentu Nasional atu tetu karik,” dehan nia.
Antonino hatutan, bele sosa kareta ba Deputadu sira maibe haree kareta neebe kondisaun ladiak ona ka la funsiona ho diak, laos sosa kareta sai hanesan pakote ida, kareta sei diak hela mos sosa nafatin neebe iha kondisaun la diak hotu ona.
“Tuir Politika Parlamentu Nasional nia ba sosa kareta nee karik kasala nee hatete,tinan 5 tenke troka kareta foun, mai hau kestiona kareta nee nia utilizasaun ba kareta sira hanesan nee hau nia hanoin laos kareta nee tinan 5 nia valor nee menus ona tun ona neebe tenke troka fali foun, se nafatin sosa kareta foun nia kustu boot nee bele mos afeita ba gastu ba orsamentu jeral neebe lao hela,” katak nia.
Nia afirma, ba oin presiza haree ona Deputadu sira nomos membru Governu sira atu tetu didiak iha proposta Orsamentu Jeral Estadu, nunee labele husu programa neebe ladun prioridade bele poupa orsamentu neebe ejiste, tanba osan nee laiha ona sei afeia ba funsionamentu estadu.
(eme)
