DILI, STLTIMORLESTE.com – Ministra Solidariedade Sosial no Inkluzaun (MSSI), Veronica das Dores husu idozu neebe nia osan koa husi Banku Nasional Komerisu Timor Leste (BNCTL) iha Suku Irabin de Cima, Postu Administrativu Uatokarbau, Munisipiu Vikeke, atu aprezenta evidensia.
Veronica hatete, prosesu pagamentu ba idozu sira oras nee lao hela iha teritoriu laran lao diak, no la hetan problema ruma.
Nia dehan, se iha prosesu pagamentu mak iha idozu ruma nia osan koa husi banku mak tenke aprezenta evidensia, nunee MSSI bele buka tuir kauza husi koa osan nee.
“Ohin iha plenaria hau hatete, fontes informasaun mai husi se, no se mak fo informasaun ida nee, fo ema nia numeru kartaun eleitoral mai para ita bele haree iha sistema, tanba hau sik deit nee hau bele koalia sala,” hatete Ministra Veronica das Dores ba jornalista sira iha resintu PN, Kuarta (01/10/2025).
Nia hatutan, sei orienta ekipa MSSI iha Munisipiu Vikeke atu halo investigasaun kona-ba problema koa idozu nia osan US$ 30 ate US$ 40, se identifika falhansu iha prosesu pagamentu nee mak sei rekolha dadus hotu hodi fo ba publiku.
“Hau kuandu kolia la iha evidensia ruma liu husi media ema bele ataka hau, neebe diak liu ami hein lai, kuandu informasaun klaru ona mak ami sei bolu media sira atu fo informasaun neebe lo-loos. Mais fasil MSSI haree hetan hela, tanba ami nia ema iha terenu mos iha hela neebe se mak halo ida nee orsida fasil ba ami atu deteta problema nee,” dehan nia.
Entretantu orsamentu neebe MSSI aloka ona atu halo pagamentu ba idozu sira iha faze datolu nee hamutuk US$ 30 milhões ital.
Molok nee Bankada Frente Revolusionariu Timor Leste Independente (FRETILIN) iha PN kestiona idozu iha Postu Administrativu Uatokarbau simu osan la kompleta iha Munisipiu Vikeke, neebe foin lalais simu sira nia subsidiu fulan tolu nian.
Kestaun nee Deputadu Bankada Partidu FRETILIN, Dário Madeira hatoo liu husi plenaria PN katak, lo-loos sira simu US$ 240 maibe simu deit US$ 180.
Jornalista: Alberto Menezes
Editora: Domingas Gomes
