DILI, STLTIMORLESTE.com – Konsesaun eskolar tama ona iha konta bankaria Eskola Bazika Filial (EBF) nu. 5 Komoro no osan refere sei uza tuir nesesidade eskola nian.
Informasaun nee hatoo husi kordenador EBF nu. 5 Komoro, Marcelino Moniz ba jornalista STL iha Komoro, Kinta nee (26/03/2026).
“Konsesaun eskolar nee tama ona, maibe ami seidauk foti, kona-ba ninia montante nee depende ba ita nian estudantes sira, maske osan nee tama ona maibe ami seidauk foti osan nee, osan ida nee ami uza tuir nesesidade eskola nian, ami la halao ezame, maibe estudantes sira halo deit avaliasaun, tanba ami ezame laiha, nee duni laiha foto kopia ruma,” nia deklara.
Nia dehan, osan ida nee sei uza ba iha ensinu aprendizajen, tanba nee uza osan ida nee tuir duni nesesidade eskola nian neebe mak presiza, nomos halo manutensaun Kiik, hadia buat balun neebe aat iha eskola, nee bolu dehan preparasaun kiik.
“Ami uza osan nee sei tuir nesesidade eskola nian, tanba osan ida nee kada estudantes sei hetan US$ 2 no osan refere depende ba iha numeru estudantes neebe mak husi eskola idak-idak iha,” katak nia.
Iha fatin seluk, Diretor EBC Manleuana, Carlos Correia dehan, kona-ba konsesaun eskolar nee foin tama horiseik, osan nee foti ona para bele fo ba eskola filial sira, ninia montante ba konsesaun nee sei nafatin hanesan ho uluk nee.
“Ami nian konsesaun eskolar nee tama ona iha konta bankaria eskola nian no osan nee rasik ami foti ona para bele entrega ba ita nian eskola filial sira bele uza ba nesesidade eskola nian, balun ami uza ba iha ezame primeiru periodu ninia,” nia dehan.
Nia akresenta, osan nee foti ona, atu nunee husi sentru no eskola filial sira bele utiliza ona osan ida nee, kona-ba montante nee depende numeru estudantes neebe mak iha.
(jac)
