DILI, STLTIMORLESTE.com — Pensaun veteranus neebe governu atribui ba ema terus nain sira inklui martires nia oan sira ho intensaun atu hadia moris, maibe pensaun nee lori mos problema iha familia balu naksobu tanba deit oan sira hadau malu ba osan veteranu inan aman sira nian.
Tuir Reprezentante CCLN Munisipiu Ainaro, Komisariu Boaventura Labok katak, kazu sira hanesan dalawain akontese iha sosiedade, maibe durante asume kargu hanesan Komisariu CCLN Munisipiu Ainaro nian iha Nasional seidauk simu keixa sira ligadu ho oan sira hadau malu ba osan veteranu inan aman sira nian.
“Problema sira hanesan kal akontese, maibe dalaruma rezolve deit iha munisipiu, entre oan sira rezolve ou bele iha mediasaun husi veteranu balu, maibe hanesan komisariu hau seidauk simu keisa sira ligadu ho oan sira hadau malu ba osan veteranu inan aman sira nian,” dehan Labok iha iha knaar fatin CCLN, Eis Arte Moris Komoro, Kinta (2026).
Nia hatete durante nia asume kargu hanesan komisariu iha deit kazu ida mai husi inan nain rua, reklama ba nia laen nia osan, ida reklama hanesan feen barlekeadu, ida fali reklama hanesan feen kazamentu, iha kazu sira hanesan nee rezolve tuir baze legal, feen ida kazamentu mak iha direitu hetan osan pensaun husi nia laen nian tanba iha dokumentu komprovativu, enkuantu feen barlekeadu labele hetan tanba laiha dokumentus.
“Hau hasoru problema sira hanesan, nia baze legal mak dokumentus, kuandu mai reklama apresenta ho dokumentu sira neebe lei husu, nee prosesu, mas mai atu reklama deit, ami la atende tanba lei haruka nunee,” dehan Labok.
Nunee mos Reprezentante CCLN Munisipiu Aileiu, Adao Rodrigues Tuna hatete, kazu sira dalaruma akontese, maibe la lori too mai nasional, problema sira hanesan nee dalaruma rezolve entre veteranus nian sira.
Nia hatete kazu oan sira hadau malu osan pensaun inan aman nian laiha, maibe oan sira husu atu fahe osan pensaun husi inan aman sira iha, nee tanba lei fo dalan, fo direitu ba oan sira hotu atu hetan pensaun husi inan aman sira niasn, kuandu iha oan ia rekere no husu sira aprezenta dokumentu hodi hetan hotu osan pensaun husi inan aman nian.
“Kazu sira hanesan ami atende, bazeia ba mata dalan mak lei, sempre rezolve tuir lei, ida mai mak lei la admite rekuza kedas,” Tuna tenik.
Kazu oan sira hadau malu pensaun veteranus nee laos buatu ka rumoris, maibe nee realidade neebe akontese iha sosiedade, iha feto ho naan, maun ho alin, hirus malu, nega malu tanba deit pensaun veteranus inan sira nian.
Kazu sira nee akontese tanba lei fo dalan ba martires ka veteranus nia oan sira hotu atu feto ka mane hotu hotu iha direitu ba pensaun veteranus neebe estadu atribui ba inan aman sira, maibe iha sosiedade patriakal, riku soin inan aman nian inklui pensaun veteranus nee so monu ba oan mane, oan feto nee hanesan bainaka, kuandu hola ona mane tenke sai ba iha mane nia uma, manda iha mane nia uma, laiha ona direitu ba rikeza mai husi inan aman nian.
Kontradiksaun entre lei ho tradisaun nee dalawain mak lori problema iha familia sira, mesmu laos martires nia oan hotu, maibe iha familia balu tanba deit pensaun inan aman nian, sira hirus malu, nega malu too atu oho malu tan.
Familia balu fali utiliza pensaun neebe estradu atribui ba nesesidade sira hotu nian, maske osan nee ema ida deit mak simu, maibe nia utilizasaun nee ba sira hotu, maun alin no feto sira. Osan nee ema ida deit mak jere hanesan kaixa oan ida iha sira nia familia, kuandu sira balu presiza urjenti, hanesan selu eskola oan sira nian, halo uma, bele foti husi kaixa nee, oan sira la hirus malu, no osan nee halo sira unidu liu, depende ba malu, iha komunikasaun diak tanba hotu hotu hetan osan pensaun neebe estradu atribui tuir sira nia nesesidade.
(god)
