LIKISA, STLTIMORLESTE.com — Prezidente Konselhu Imprensa (KI), Otelio Ote husu ba komunidade jornalista iha Timor Leste atu halao servisu jornalizmu nian ho kredibel no akuntabel, la bele sai jornalista serimonial.
“Hau haree barak liu jornalista sira halo kobertura ba eventu serimonial hanesan inaugurasaun, koa fita no serimonial seluk. Style notisia hanesan nee uluk jornalista husi media estadu (TVRI) mak halo. Jornalista tenke buka kauza husi eventu serimonial nee, tanba saida mak koa fita,” hatete Otelio Ote bainhira koalia iha formasaun segundu parte neebe KI realiza iha Likisa (12/12/2024).
Formasaun ho programa ambiental nee espesialmente loke husi Sekretariadu Asuntu Finansas, Fernando Conceicao, reprezenta Prezidente Munisipiu Likisa no formador mai husi Indonezia, eis jornalista Tempo no TIRAS, Untung Widyanto.
Otelio Ote husu ba jornalista sira atu aprende no kompreende diak ba oportunidade neebe iha, tenke halao servisu nuudar profisionalizmu, buka hatene informasaun neebe lo-loos no kredivel, hodi afirma ba publiku ho informasaun transparente.
Otelio Ote dehan, formasaun nee importante tebes ba jornalista Timoroan hotu, oinsa bele halao atividade mundu jornalizmu nian ho dignu, no profisionalidade atu sosiedade kompreende informasaun neebe fo sai ba publiku.
Tuir nia, jornalista tenke servisu tuir matadalan mundu jornalizmu neebe iha, katak rekolha informasaun tuir kode etika neebe iha, presiza lori informasaun neebe atuais, faktuais, nunee ema hotu bele hatene situasaun ka kondisaun ruma neebe akontese iha rai laran.
Nia mos afirma katak, jornalista labele manan oportunidade deit, maibe tenke sai ema intelijente neebe diak ba informasaun sira, labele sai jornalista neebe laiha transparente, maibe tenke ema neebe iha espiritu independente, atu trasa informasaun neebe diak ba publiku hodi lee.
Iha biban nee, formador husi Indonesia, Untung Widyanto dehan, notisia mak produtu jornalista ida nian, neebe iha tipu rua husi notisia ka reportajen, notisia direta ka badak straight news ka hard news no notisia klean naruk investigativu softnews ka feature, husi informasaun hirak nee jornalista presiza elabora ho diak, nunee publiku bele entende ho diak informasaun neebe fo sai.
Tanba karateristika prinsipal husi notisia direta mak baibain uza liafuan sira neebe direta, informasaun nee jornalista sira bainhira hakerek ona liu husi maneira atu oinsa hakerek badak deit, maibe ho informasaun solidu, bazeia ba kondisaun neebe iha no la inklui opiniaun jornalista nian.
“Ita tenke halo diferensia ida husi straight news ho softnews mak iha ninia komponente sira mak hanesan saida, se iha neebe, no bainhira, kuandu jonalista foti ona informasaun, labele sai husi dalan ida nee, tanba ida nee mak sai dalan ida atu elabora informasaun nee loos no kredivel ba publiku,” katak nia.
Nia dehan, servisu jornalista laos buka oportunidade, maibe presiza profisionaliza servisu, eduka sosiedade sai efetivu. Jornalista nia servisu mak oinsa buka tuir informasaun, hodi publika ba publiku, mundu atu hatene situasaun neebe komunidade ka estadu nee enfrenta, tanba nee jornalista tenke servisu ho transparente labele buka oportunidade, maibe tenke sai ema edukador hodi eduka sosiedade sai buras ho diak.
Nia hatutan, knaar jornalista nian mak hakerek informasaun neebe los no kredivel, laos aumenta fali interese jornalista iha laran hodi halo kritika, nee matadalan ida nee fora husi etika jornalizmu nian, tanba nee jornalista hotu-hotu tenke ativa masimu iha mundu jornalizmu nian, oinsa bele hakerek informasaun nee faktu no atuais ba publiku sira hodi lee no hatene.
“Ita mak sai autor ba hakerek preokupasaun povu nian, ita mak sai matadalan no edukador ba informasaun sira neebe los no sala, nunee bele hafanu ba parte relevante sira hodi dezenvolve ba nesesidade sira nee nuudar preokupasaun iha sosiedade,” dehan nia.
Diretor Ezekutivu KI, Antonio Dias hatete, formasaun ida nee importante tebes ba jornalista sira, tanba kontestu hakerek relasiona ho ambitu jornalizmu ambiental nian, signifika katak pratika sira jornalizmu nian neebe relasiona ho problema sira ambiente nian no pertense liu ba sustentabilidade ambiental.
Iha fatin hanesan, Sekretariu Asuntu Finansas, Fernando Conceicao neebe reprezenta PAM Likisa hatete, jornalista tenke esforsu an hodi update nafatin informasaun tuir kodiku jornalizmu nian, tanba husi jornalista mak ema bele konhese sosiedade nia problema no preokupasaun sira.
Tanba nee husi meiu hirak neebe jornalista sira foti atu halo, presiza lori informasaun neebe klaru, detalhu hodi konvida publiku atu partisipa no hatene katak kondisaun ka situasaun neebe sosiedade sempre enfrenta, mai ho razaun nee razoavel, entaun jornalista nia knaar mak tenke buka hatene fukun husi preokupasaun sira neebe komunidade enfrenta iha publiku.
(mik)
